نۇرلان اقۇرپەكوۆ: قارسىلاسى مىقتى. ءبىراق قانات جەڭۋگە ءتيىس

سول كەشتىڭ باستى باسەكەسىندە ءبىرىنشى ورتا سالماقتا (69 كەلى) WBO NABO جانە WBA Inter- ontinental نۇسقالارىنىڭ التىن بەلبەۋ يەگەرى اتانىپ وتىرعان قازاقتىڭ ماقتانىشى قانات يسلام كانادانىڭ ەشكىمنەن جەڭىلىپ كورمەگەن كوكجالى برەندون كۋكپەن جۇدىرىقتاسادى.

وسى جەكپە-جەككە بايلانىستى ءبىرقاتار ماماندار ءوز ويلارىن ءبىلدىرىپ، ءتۇرلى جورامال ايتۋدا. ءبىز ءوز كەزەگىمىزدە وليمپيادا ويىندارىنىڭ جەڭىمپازى مەن باركەر كۋبوگىنىڭ يەگەرى باقتيار ارتايەۆتىڭ جەكە جاتتىقتىرۋشىسى، «استانا ارلاندارى» كلۋبىنىڭ باس باپكەرى نۇرلان اقۇرپەكوۆتى سوزگە تارتقان ەدىك.

- قانات كوز الدىمىزدا وسكەن بوكسشى. كەزىندە قىتاي قۇراماسى ساپىندا ونەر كورسەتكەن جىلدارى باقتيار ارتايەۆپەن تالاي رەت سپاررينگ وتكىزگەن ول مەنىڭ ءتول شاكىرتىمە تەگەۋرىندى قارسىلىق كورسەتتى. سول كەزدىڭ وزىندە جات ەلدە وسكەن قانداسىمىز ءوزىنىڭ تاباندىلىعى، وجەتتىگى، قايسارلىعى، اسقان شەبەرلىگىمەن كوزگە ءتۇستى.

اۋەسقوي بوكستا يسلامنىڭ باعىندىرعان بەلەستەرى ءبىر توبە. ول - وليمپيادا جانە ازيا ويىندارى، الەم جانە قۇرلىق چەمپيوناتتارىندا جۇلدەگەرلەر ساناتىنا قوسىلدى. ەكى ميللياردقا جۋىق حالقى بار قىتايدىڭ باس بوكسشىسى اتاندى. ارينە، ونداي باق ەكىنىڭ بىرىنە بۇيىرا بەرمەيدى. كاسىپقوي بوكسقا اۋىسقالى بەرى مەن قانات باۋىرىمنىڭ ءار قادامىن ءجىتى قاداعالاپ ءجۇرمىن. بۇل رەتتە دە ول ءوزىنىڭ مىقتىلىعىن مويىنداتىپ، قارسى كەلگەندەردىڭ بارلىعىن قوعاداي جاپىرۋدا.

باسەكەلەرىنىڭ دەنىن نوكاۋتپەن اياقتادى. قازاق جىگىتىنىڭ الداعى قارسىلاسى جايىندا ايتار بولساق، شىنى كەرەك، مەن برەندون كۋكتىڭ جەكپە-جەكتەرىن كورگەن ەمەسپىن. ءبىراق بۇل سالادا قول جەتكىزگەن تابىستارى قوماقتى ەكەن. ول 18 رەت رينگكە كوتەرىلىپ، بارلىعىندا جەڭىسكە جەتتى. 11 قارسىلاسىن ەسىنەن تاندىردى. وسى دەرەكتىڭ ءوزى-اق كانادالىقتىڭ قانداي قارۋلى بوكسشى ەكەنىن اڭعارتسا كەرەك.

قالاي بولعاندا دا قاناتقا 9-قىركۇيەكتە وڭاي بولمايدى. دەسەك تە ءوز ەلىمىزدە، ءوز جەرىمىزدە وتەتىن باسەكەدە قازاقتىڭ ۇلى ءوز جانكۇيەرلەرىن جەرگە قاراتپاۋعا ءتيىس. يسلام بوكس مەكتەبىنىڭ بارلىق ساتىلارىنان ءوتىپ، تالاي ۇلى دۇرمەكتەردە ىسىلعان ورەن. سول سەبەپتى دە قانداسىمىز وسى ايقاستى ءوز پايداسىنا شەشەدى دەگەن سەنىمدەمىن. ەگەر وسى جوسپار جۇزگە اسسا، وندا ول بەلدى نۇسقالاردىڭ چەمپيوندىق تاجىنە ءبىر تابان جاقىنداي تۇسەدى. الداعى ۋاقىتتا ول بەلەستە باعىنادى دەپ ويلايمىن. سول كۇندى كورۋگە جاسسىن، اعايىن!، - دەيدى نۇرلان اقۇرپەكوۆ

ەستەرىڭىزگە سالا كەتەيىك، 9-قىركۇيەكتە استاناداعى بوكس كەشى مادەنيەت جانە سپورت مينيسترلىگى، «سامۇرىق - قازىنا» ۇلتتىق ءال-اۋقاتى قورى، ZHERSU وندىرىستىك- ينۆەستيتسيالىق كورپوراتسياسى جانە استانا قالاسى اكىمشىلىگىنىڭ مۇرىندىق بولۋىمەن حالىقارالىق ەكسپو كورمەسى اياسىندا ۇيىمداستىرىلادى.

عالىم سۇلەيمەن

«ايقىن»

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى