مەملەكەتتىڭ ميللياردتاعان قارجىسىن تالان-تاراجعا سالعان ەكس-دەپۋتات ايىپپۇل تولەپ، اباقتىدان شىقتى
ونىڭ جازا مەرزىمىنىڭ تورتتەن ءبىر بولىگى قىسقارتىلىپ، كەيىن ايىپپۇلعا اۋىستىرىلدى، دەپ حابارلايدى قازاقپارات ءتىلشىسى.
اقتوبەدەگى «ەمشان» كومپانياسىنىڭ ديرەكتورى مەيىرجان وندىرگەنوۆ جولاۋشىلار تاسىمالىنا بولىنگەن ميللياردتاردى تالان-تاراجعا سالعانى ءۇشىن وتكەن جىلى سوتتالعان بولاتىن. ايىپتاۋ قورىتىندىسىنا سۇيەنسەك، ول 4,5 ميلليارد تەڭگەنى جىمقىرعان. ءىس ءبىر جىلعا جۋىق ۋاقىت بويى تەرگەلىپ، ەكس-دەپۋتات مەيىرجان وندىرگەنوۆ بىرنەشە قورعاۋشى جالدادى.
پروكۋرور سوتتان م. وندىرگەنوۆتى 10 جىلعا، ەربول ءادىلوۆتى 8 جىلعا باس بوستاندىقتارىنان ايىرۋدى سۇراعانىمەن، سوت 2016 -جىلدىڭ 1 -تامىزىندا العاشقىسىن 4 جىلعا، سىبايلاسىن 3 جىلعا باس بوستاندىعىنان ايىرۋ تۋرالى ۇكىم شىعاردى.
ءبىر جىل وتكەن سوڭ سوتتالۋشىلار راقىمشىلىققا ىلىكتى. «ق ر تاۋەلسىزدىگىنىڭ 25 جىلدىعىنا وراي راقىمشىلىق تۋرالى» زاڭىنا سايكەس شىعىندى تولىق تولەگەن سوتتالۋشى جازا مەرزىمىنىڭ تورتتەن ءبىرىن قىسقارتا الادى.
ماتەريالعا سۇيەنسەك، اقتوبە وبلىستىق قىلمىستىق اتقارۋ جۇيەسى دەپارتامەنتى سوتتالۋشى مەيىرجان وندىرگەنوۆ پەن ەربول ادىلوۆكە جاقسى مىنەزدەمە بەرگەن. ولار جازاسىن وتەۋ كەزىندە ءتارتىپ بۇزباعان، مەملەكەتكە كەلتىرىلگەن شىعىندى تولىق وتەگەن. سوتتالۋشىلاردىڭ ءتارتىبى جاقسارعان. وسى جايتتار ەسكەرىلىپ، سوتتالۋشىلاردىڭ راقىمشىلىق تۋرالى ۇسىنىستارى قاناعاتتاندىرىلدى.
№2 اقتوبە قالالىق سوتىنىڭ شەشىمىمەن مەيىرجان وندىرگەنوۆ جانە ەربول ءادىلوۆتىڭ جازا مەرزىمى تورتتەن بىرگە قىسقارتىلىپ، ايىپپۇلعا اۋىستىرىلدى. پروكۋراتۋرا سوت شەشىمىمەن كەلىستى. قازىرگى ۋاقىتتا سوت شەشىمى كۇشىنە ەندى»، - دەپ حابارلادى اقتوبە وبلىستىق سوتىنىڭ باسپا ءسوز قىزمەتى.
ايتا كەتەيىك، مەيىرجان وندىرگەنوۆ «الاياقتىق»، «باس بوستاندىعىنان زاڭسىز ايىرۋ»، «قورقىتىپ الۋشىلىق»، قىلمىستىق جولمەن الىنعان اقشانى جانە (نەمەسە) وزگە مۇلىكتى زاڭداستىرۋ (جىلىستاتۋ)»، «ۇيىمداسقان توپ، قىلمىستىق ۇيىم قۇرۋ جانە ولارعا باسشىلىق ەتۋ، سول سياقتى ولارعا قاتىسۋ» باپتارى بويىنشا ايىپتالدى.
ال ەربول ءادىلوۆ الاياقتىق، قىلمىستىق توپ بولىپ اسا ۇلكەن مولشەردە بوتەننىڭ مۇلكىن جىمقىرۋ، الداۋ نەمەسە سەنىمدى تەرىس پايدالانۋ جولىمەن بوتەن مۇلىككە قۇقىقتى يەمدەنۋ قىلمىسىن جاساعانى ءۇشىن سوتتالدى. سوت ءادىلوۆتى 3 جىلعا باس بوستاندىعىنان ايىرعان بولاتىن.
اۆتور: التىناي ساعىندىقوۆا
