اتى شۋلى مۇراتحان توقماديدىڭ قىلمىس الەمىندەگى بەدەلى جايىندا تىڭ اقپارات شىقتى
تەرگەۋشىلەر توقماديدىڭ ۇيىنەن بىرنەشە قارۋ-جاراق پەن وق-ءدارى سەيفىن تاپقان. ءتىپتى، 90-جىلدارى جاساعان ارەكەتتەرىنەن بولەك، شىنى زاۋىتىن كىمنەن تارتىپ العانى دا بەلگىلى بولدى.
قارۋ-جاراق بەلگىلى بيزنەسمەننىڭ اپكەسىنىڭ ۇيىنەن دە شىقتى. تۋىسىنىڭ ايتۋىنشا، «ماكاروۆ» جانە «ت ت» ماركالى تاپانشالاردى تاعى ءبىر اعايىنى بەكەن يمانقاليەۆ اكەپ بەرگەن. ال ونى جۇمساعان مۇراتحاننىڭ ءوزى ەكەن. قارۋ تاسىعان قىزمەتى ءۇشىن بەكەن تەمىر توردىڭ ارعى جاعىن كورىپ تە قايتىپتى. بۇگىندە اعاسىمەن ات قۇيرىعىن كەسىسكەن بەكەن مۇراتحاننىڭ 90-جىلدارى قالاي كوتەرىلگەنىن بىلاي ەسكە الادى.
«ونىڭ كريمينالدىق ءومىرى سول جىلدارى باستالدى. رەكەتير بولدى. قالاداعى قىلمىستىق توپتاردىڭ اراسىندا ونىڭ ەسىمى سونداي تانىمال ەدى. بىرەۋلەردىڭ اقشاسىن، بىرەۋلەردىڭ پاتەرىن تارتىپ الدى، مەيرامحانالارعا «كرىشا» بولدى. سونداي جولمەن بايىدى»، - دەيدى يمانقاليەۆ.
قۇقىق قورعاۋ ورگاندارىنىڭ دەرەكتەرىنە سۇيەنسەك، 2004-جىلى ساياتشىلىق كەزىندە ونىمەن بىرگە بولعان بەلگىلى بانكير ەرجان تاتىشەۆ قازا تاپقان. سوڭعى ۋاقىتتارى داۋعا اينالعان شىنى زاۋىتىندا دا توقماديدىڭ ەسىمى تازا ەمەس. ءوندىرىس وشاعىن بىرلەسىپ اشىپ، ميلليونداعان اقشاسىن جۇمساعان سەرگەي نەپروپەكين اقىر سوڭىندا ءوز ۇلەسىن ءبىر تيىنسىز توقماديدىڭ اتىنا جازىپ بەرۋگە كەلىسىپتى.
«باسقا امالىم قالمادى. ماعان ايتقانى، «سەنىمەن سويلەسكىم كەلمەيدى، وتباسىڭىزدى، بالالارىڭىزدى ويلاڭىز» دەدى. بۇل ناعىز ساتقىندىق ەدى. ونىڭ ءىسىن بۇزاقىلىق، رەكەتيرلىك ارەكەت دەۋگە بولادى. ول تەك ادامدى قورقىتىپ، قاجەت بولسا قيناپ بارىپ وزىنە كەرەگىن الاتىن»، - دەپ جايىپ سالدى نەپروپەكين.
اۋىلدان شىققان قاراپايىم ازامات قالايشا ەلىمىزدەگى ەڭ باي ادامداردىڭ تىزىمىنە ەندى؟ بۇل شىن مانىندە كوپتى ويلاندىراتىن سۇراق. ءتىپتى، قۇنى ميلليون دوللاردان اسىپ جىعىلاتىن پاتەردە تۇرىپ جاتقان توقماديگە ەكىنشى قۇجات نە ءۇشىن قاجەت بولدى؟ ەگەر ول قىلمىستىق توپ جەتەكشىسى بولسا، تايراڭداپ جۇرۋىنە كومەكتەسكەن كىم؟ تەرگەۋشىلەر وسى ساۋالداردىڭ جاۋابىن تابۋعا تىرىسىپ جاتىر.
