كورەيانىڭ جاڭا بيلىگى قازاقستانمەن تىعىز جۇمىس جاساۋعا مۇددەلى - كيم دە سيك

  دەپ حابارلايدى قازاقپارات ءتىلشىسى.

 «مەنىڭ قازاقستانعا ەلشى بولىپ كەلگەنىمە ءۇش اي عانا بولدى. دەگەنمەن، وسى ۋاقىتتىڭ ىشىندە قازاقستاننىڭ ءبىراز جەتىستىكتەرگە جەتكەنىنە كوزىم جەتتى. نۇرسۇلتان نازاربايەۆ بولسا، وسى جولدا وڭتۇستىك كورەيانىڭ تاجىريبەسى جايىندا ىلعي ايتىپ وتىرادى. قازاق حالقى دا وتە مادەنيەتتى. كوشەدە كەلە جاتقاندا مەنىمەن كارىس تىلىندە امانداساتىندار كەزدەسەدى. شىنىمدى ايتسام، وندايدا توبەم كوككە ءبىر ەلى جەتپەي قالادى. قازىرگى كەزدە كورەيادا جاڭا پرەزيدەنتتىڭ كەلگەنىن جاقسى بىلەسىزدەر. پرەزيدەنتىمىزدىڭ جاڭا اكىمشىلىگى قازاقستانمەن اراداعى ىنتىماقتاستىق بايلانىستاردى كۇشەيتۋدى قالايدى. مەن بولسام، جاڭا ەلشى رەتىندە وسى جولدا بار كۇش- جىگەرىمدى سالامىن»، - دەيدى كيم دە سيك.

ەلشىنىڭ ايتۋىنشا، بۇگىندە مۇناي باعاسىنىڭ قۇبىلۋىنا بايلانىستى ەكى ەلدىڭ ساۋدا- ساتتىعى ءبىرشاما باياۋلاپ قالدى.

 «دەگەنمەن، قازاقستان تابيعي رەسۋرستارعا باي ەل، تاۋار تاسىمالداۋ جاعىنان گەوگرافيالىق ورنالاساۋى دا ءتيىمدى. ال كورەيادا تەحنولوگيالار بار. سوندىقتان بىزدە ءوزارا ارىپتەستىك ورناتاتىن سالالار كوپ. بولاشاقتا ىنتىماقتاستىق بايلانىستارىمىزدى تەرەڭدەتە الامىز»، - دەپ اتاپ كورسەتتى سيك مىرزا.

ايتا كەتەيىك، بۇگىن استانادا قازاقستان - كورەيا ىسكەرلىك كەڭەسىنىڭ VI وتىرىسى باستالدى. وتىرىستىڭ باسىندا كەڭەستىڭ تەڭ ءتوراعاسى سان- حو شين اعىنان جارىلىپ، كارىس كاسىپكەرلەرىنىڭ قازاق جەرىندە جۇمىس ىستەگىسى كەلەتىنىن جەتكىزدى. ونىڭ ويىنشا، دا قازاقستاندا بيزنەس ءۇشىن جاقسى جاعداي جاسالعان.

 اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى