ۇزدىك كورەيا ۋنيۆەرسيتەتىنە قالاي تۇسۋگە بولادى
استانا قالاسىنداعى نازاربايەۆ زياتكەرلىك مەكتەبى باسپا ءسوز قىزمەتىنىڭ حابارلاۋىنشا، ۇمىتكەرلەر 19 - شىلدە كۇنى استانا مەن الماتى قالالارىنداعى نازاربايەۆ زياتكەرلىك مەكتەپتەرىندە باق سىناعان. ەمتيحان بيىل وسىمەن ءۇشىنشى رەت ۇيىمداستىرىلىپ وتىر.
«ءبىزدىڭ ۋنيۆەرسيتەت وڭتۇستىك كورەيادا ورنالاسقان. بۇل جەردە Hyundai, Samsung, LG سەكىلدى وزدەرىڭىزگە جاقسى تانىس الپاۋىت كومپانيالار ورنالاسقان. قازاقستاندىق ستۋدەنتتەر نارىققا پايدالى بارلىق ماماندىقتاردا ءبىلىم الا الادى. كورەيا رەسپۋبليكاسى دامىعان ەلدەردىڭ قاتارىنا جاتادى. ءبىز تاۋار ءوندىرۋشى ەلمىز. سوندىقتان قازاقستاندىق جاستار بىزدەن ءبىلىم مەن تاجىريبە جيناقتاپ، ءوز ەلىنىڭ دامۋىنا ات سالىسا الادى»، دەيدى پۋسان ۇلتتىق ۋنيۆەرسيتەتىنىڭ پروفەسسورى سانگيان كيم.
سونىمەن قاتار، كورەيادان كەلگەن قوناقتار وزدەرىنىڭ وقۋ ورىندارى جايلى وقۋشىلار مەن اتا- انالارعا بايانداما جاسادى. پۋسان - كورەيا رەسپۋبليكاسىنداعى ەڭ ءىرى پورت جانە سەۋلدەن كەيىنگى ەڭ ءىرى قالا. جەرگىلىكتى جۇرت بۇل قالانى «كورەيانىڭ تەڭىز استاناسى» دەپ تە اتايدى. تىكەلەي ورتالىققا باعىناتىن پۋسان قالاسى كورەي تۇبەگىنىڭ وڭتۇستىك- شىعىس بولىگىندە، كورەي بۇعازىنىڭ جاعالاۋىندا ورنالاسقان پۋسان ۇلتتىق ۋنيۆەرسيتەتىنىڭ ەكىنشى كۋرس ستۋدەنتتەرى جۇپاروۆا ازەل، سىرىمبەتوۆا زاعيرا، سادۋاقاس اليشەردىڭ ايتۋىنشا، تەڭىز جاعاسىندا ورنالاسقان پۋسان قالاسى ادەمىلىگى جاعىنان ەشقانداي قالاعا كەم تۇسپەيدى.
پۋساننىڭ اۋاسى ىلعالدى، جاڭبىر كوپ جاۋادى. ۋنيۆەرسيتەتتىڭ وقۋ باعاسى ءبىر سەمەستر ءۇشىن 2 مىڭ دوللار شاماسىندا. سونداي- اق، نازاربايەۆ زياتكەرلىك مەكتەپتەرىمەن پۋسان ۇلتتىق ۋنيۆەرسيتەتىنىڭ اراسىندا ارنايى كەلىسىمشارت بار. وسى قۇجات بويىنشا قازاقستاندىق تۇلەكتەر كورەي ءتىلىن بىلمەسە دە وقۋعا قابىلدانادى. ولار ەكى جىل بويى ارنايى بەيىمدەلگەن باعدارلاما ارقىلى كورەي ءتىلىن قاتار ۇيرەنەدى. 2002 -جىلدارى پۋساندا ازيا ويىندارى جانە فۋتبولدان FIFA World Cup الەم چەمپيوناتى ءوتتى. ال 2005 -جىلى ازيالىق تىنىق مۇحيت ارالىق ەكونوميالىق ارىپتەستىك فورۋمىنىڭ استاناسى اتاندى.
