كەلەسى جىلى ەڭ تومەنگى زەينەتاقى ءومىر ءسۇرۋ مينيمۋمىنان ەكى ەسەگە ارتادى
ۆەدومستۆو باسشىسى پاۆلودار، قاراعاندى، قوستاناي جانە سولتۇستىك قازاقستان وبلىستارىنىڭ ەڭبەك ارداگەرلەرىنىڭ ساۋالدارىنا جاۋاپ بەردى.
قاراعاندىلىق دميتريي ماكاروۆيچ بويكو ەلىمىزدەگى مينيمالدى زەينەتاقىنىڭ مولشەرىن ارتتىرۋ ماسەلەسىن كوتەرىپ، ءوزىنىڭ ەسەپتەۋلەرىن ۇسىندى.
«بىزدە زەينەتكەرلەردىڭ ۇشتەن ءبىر بولىگى مينيمالدى زەينەتاقى الادى. ال ەگەر 44000 تەڭگە الاتىنداردى ەسەپكە الار بولساق، ەلىمىزدەگى بارلىق زەينەتكەرلەردىڭ 45 بولادى. سوڭعى جىلداردا زەينەتاقى دوللارعا شاققاندا 80 پايىزعا «ارىقتاپ» قالدى. ءبىرىڭعاي جيناقتاۋشى زەينەتاقى قورىندا ورتاشا ەسەپپەن العاندا ءاربىر شوتتا 860000 تەڭگە جاتىر. ەگەر زەينەتكەرلەردىڭ زەينەتكە شىققان سوڭ 12 جىلداي ءومىر سۇرەتىنىن ەسكەرسەك، جىلىنا 72500 تەڭگەدەن، ايىنا 6000، ال كۇنىنە 200 تەڭگەدەن شىعۋى ءتيىس»، - دەدى دميتريي بويكو.
ءوز كەزەگىندە تامارا دۇيسەنوۆا ءبىرىڭعاي جيناقتاۋشى زەينەتاقى قورىنداعى سالىمداردىڭ جالپى سوماسىنان قازاقستاندىقتاردىڭ جيناعىنىڭ ورتاشا سوماسىن ەسەپتەۋ دۇرىس ەمەستىگىن اتاپ ءوتتى. سەبەبى كەي سالىمشىلار قورعا 1998- جىلدان باستاپ تىركەلسە، كەيبىرى ەندى عانا تىركەلگەن.
«سوندىقتان اركىمنىڭ سالىم كولەمى ءارتۇرلى بولادى. جانە ودان ورتاشا سومانى ەسەپتەۋ دۇرىس ەمەس. ءبىراق مەن سالىم مولشەرلەرى از ەكەنىمەن كەلىسەمىن. وعان سەبەپ - ءبىزدىڭ ەلىمىزدە جالاقى جوعارى ەمەس. الايدا ءبىز ونى ۇلعايتۋعا بىرتىندەپ قادام باسىپ كەلەمىز»، - دەدى تامارا دۇيسەنوۆا.
مينيستر سونداي- اق الداعى ۋاقىتتا زەينەتاقى مولشەرىنىڭ ارتاتىنى تۋرالى دا ايتتى. كەلەسى جىلدان باستاپ، 1998- جىلى زەينەتكە شىققاندار، سونىمەن قاتار تولىق ەڭبەك ءوتىلى بارلار، بازالىق زەينەتاقى رەتىندە قازىر تولەنىپ وتىرعان 14000 تەڭگەنىڭ ورنىنا 28000 تەڭگە الاتىن بولادى. وسىلايشا زەينەتاقى سوماسى ەڭبەك وتىلىنە جانە جالاقى مولشەرىنە بايلانىستى ءومىر ءسۇرۋ مينيمۋمىنان ەكى نەمەسە ودان كوپ ەسە ارتىق بولادى.
