قانات يسلام جۇدىرىقتاساتىن بوكس كەشىندە ونەر كورسەتەتىن قازاقستاندىق بوكسشىلار انىقتالدى
بوكس كەشىنىڭ باستى جەكپە-جەگىندە ورتا سالماقتاعى WBO NABO جانە WBA Inter- Continental تۇجىرىمدارى بويىنشا الەم چەمپيونى قانات «QAZAQ» يسلام (24-0, 19 ك و) ءوز بەلبەۋلەرىن جەڭىلىپ كورمەگەن كانادالىق برەندون كۋكقا قارسى قورعايدى.
سونىمەن قاتار بوكس كەشىندە تاعى سەگىز قازاقستاندىق بوكسشى جەكپە-جەك وتكىزەدى. ولار الىس جانە جاقىن شەتەلدىك بوكسشىلارمەن جۇدىرىقتاسادى. نازارلارىڭىزعا ەكسپو كورمەسى اياسىندا وتەتىن بوكس كەشىنە قاتىساتىن قازاقستاندىق بوكسشىلاردىڭ ءتىزىمىن ۇسىنامىز:
1. قانات يسلام - كاسىپقوي بوكستا ءالى جەڭىلمەگەن قازاقستاندىق بوكسشى. وسى ۋاقىتقا دەيىن وتانداسىمىز كاسىپقوي بوكس شارشى الاڭىندا 24 كەزدەسۋ وتكىزىپ، بارلىعىندا جەڭىسكە جەتكەن. 19 كەزدەسۋدە «QAZAQ» قارسىلاستارىن نوكاۋتقا تۇسىرگەن. قازىرگى ۋاقىتتا ورتا سالماقتاعى WBA Inter- Continental, WBO NABO (WBO Inter- Continental: WBA Fedelatin جانە WBA Fedecari بەلبەۋلەرىنىڭ يەگەرى.
2. جانقوش تۇراروۆ - جارتىلاي ورتا سالماقتاعى ۇلتتىق بوكس قاۋىمداستىعىنىڭ (NBA) چەمپيونى. كاسىپقوي بوكستا 21 كەزدەسۋ وتكىزىپ، بارلىعىندا جەڭىسكە جەتكەن. 15 رەت قارسىلاسىن نوكاۋتقا تۇسىرگەن.
3. جانىبەك ءالىمحان ۇلى - ەڭبەك سىڭىرگەن سپورت شەبەرى، ريو-دە-جانەيرو قالاسىندا وتكەن وليمپيادا ويىندارىنىڭ شيرەك فينالىنا شىققان. ازيا ويىندارىنىڭ، ازيا بىرىنشىلىگىنىڭ جانە الەم چەمپيوناتىنىڭ جەڭىمپازى. كاسىپقوي بوكستا ءبىر كەزدەسۋ وتكىزىپ، جەڭىسكە جەتكەن.
4. مەيىرىم نۇرسۇلتانوۆ - ورتا سالماقتاعى ەلىمىزدەگى ەڭ تالانتتى بوكسشىلاردىڭ ءبىرى. كاسىپقوي بوكستا ءۇش كەزدەسۋ وتكىزىپ، ۇشەۋىندە دە جەڭىسكە جەتتى. سوڭعى كەزدەسۋىن 15- شىلدە كۇنى ا ق ش- تىڭ لوس-اندجەلەس قالاسىندا امەريكالىق لەنني داردارعا قارسى وتكىزىپ، جەڭىسكە جەتتى.
5. رۋسلان مىرساتايەۆ - حالىقارالىق دارەجەدەگى سپورت شەبەرى. الەم چەمپيوناتى مەن وليمپيادا ويىندارىنىڭ شيرەك فينالىنا شىققان. بەس ماۋسىم بويى بۇكىلالەمدىك بوكس سەرياسىندا (WSB) ونەر كورسەتەتىن ەلوردالىق «استانا ارلاندارى» كلۋبىنىڭ نامىسىن قورعاعان. كاسىپقوي بوكستا ەكى كەزدەسۋ وتكىزىپ، ەكەۋىندە دە جەڭىسكە جەتكەن.
6. ءالي احمەدوۆ - احمەدوۆ كاسىپقوي بوكس شارشى الاڭىندا جەتى كەزدەسۋ وتكىزىپ، بارلىعىندا جەڭىسكە جەتكەن.
7. ايدوس ەربوسىن ۇلى كاسىپقوي بوكستا التى كەزدەسۋ وتكىزىپ، بارلىعىندا جەڭىسكە جەتكەن.
8. ديماش نيازوۆ - نيۋ- يورك قالاسىنىڭ پوليتسيا قىزمەتكەرى. كاسىپقوي بوكستا 11 كەزدەسۋ وتكىزىپ، بارلىعىندا دا قارسىلاستارىنان ۇستەم تۇسكەن. تۋعان جەرىندە ءبىرىنشى رەت كەزدەسۋ وتكىزگەلى جاتىر. ويتكەنى ديماش 13 جاسىندا ا ق ش- قا كوشىپ كەتكەن. دەگەنمەن ول بوكستىڭ الىپپەسىن شىمكەنت قالاسىندا قازاقستاننىڭ ەڭبەك سىڭىرگەن جاتتىقتىرۋشىسى نۇرعالي سافيۋلليننەن ۇيرەنگەن.
9. نۇرسۇلتان جاڭابايەۆ - WBA China بەلبەۋىنىڭ يەگەرى. كاسىپقوي بوكستا ءۇش كەزدەسۋ وتكىزىپ، ۇشەۋىندە جەڭىسكە جەتتى.
