قيىرداعى قازاقتار تۋرالى دەرەكتى فيلم تۇسىرىلەدى
بۇل تۋرالى ق ر اقپارات جانە كوممۋنيكاتسيالار ءمينيسترى داۋرەن ابايەۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ءمالىم ەتتى.
«الەم بويىنشا شەتتە جۇرگەن قانداستاردى ەلگە جيناعان ساناۋلى عانا مەملەكەت بار. سولاردىڭ ءبىرى - قازاقستان. ەگەمەندىك العان 26 جىلدا 1 ميلليونعا جۋىق قانداستارىمىز ەلگە ورالدى. مەملەكەت باسشىسى جاقىندا وتكەن دۇنيەجۇزى قازاقتارىنىڭ 5- قۇرىلتايىندا «ەلىم دەگەن ءاربىر قازاققا ءارقاشان قازاقستاننىڭ ەسىگى اشىق» دەدى.
ياعني، كوش ءالى توقتاعان جوق، الداعى ۋاقىتتا دا جالعاسا بەرەدى دەگەن ويدامىز. وسى ورايدا، ەلباسى تاپسىرماسىنا ساي، اقپارات جانە كوممۋنيكاتسيالار مينيسترلىگى «قيىرداعى قازاقتار» جوباسىن قولعا الىپ وتىر»، - دەدى داۋرەن ابايەۆ.
ءمينيستردىڭ حابارلاۋىنشا، دەرەكتى فيلم قازاقستان پرەزيدەنتى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» ماقالاسى اياسىندا ۇلتتىق سانامىزدى جاڭعىرتۋ جانە ءتول تاريحىمىزعا تىڭ سەرپىلىس اكەلۋدى كوزدەيدى. وندا رەسەي، تۇرىكمەنستان، وزبەكستان، تاجىكستان، اۋعانستان، يران، قىتاي جانە موڭعوليا سىندى 8 مەملەكەتتىڭ اۋماعىنداعى قازاقتاردىڭ تۇرمىسى، تاريحى، ەرەكشە داستۇرلەرى مەن مادەنيەتى كورىنىس تابادى.
دايىن بولعان فيلم تاۋەلسىزدىك كۇنى قارساڭىندا «National Digital History» پورتالى ارقىلى جۇرتشىلىق نازارىنا ۇسىنىلادى.
«ەلباسى ايتقانداي، «رۋحاني جاڭعىرۋ دەگەنىمىز - بۇكىل حالقىمىزدىڭ جاڭعىرۋى». سوندىقتان، شەتەلدەگى قانداستارىمىزدى دا نازاردان تىس قالدىرماي، اراداعى اقپاراتتىق بايلانىستى كۇشەيتۋدى، رۋحاني تۇتاستىققا ۇلەس قوسۋدى كوزدەپ وتىرمىز»، - دەپ ءوز ءسوزىن تۇيىندەدى مينيستر.
جوبا اۆتورى جانە «National Digital History» ينتەرنەت-جوباسىنىڭ جەتەكشىسى ولجاس بەركىنبايەۆ ەكسپەديتسيا توبىنىڭ الداعى جوسپارىمەن ءبولىستى.
«شىلدە ايىندا ەكسپەديتسياعا شىعىپ كەتۋدى جوسپارلاپ وتىرمىز جانە ساپارىمىزدى رەسەيدەن باستايمىز. رەسەيدە ومبى، قورعان، ورىنبور، استراحان ايماقتارىنداعى قازاقتارعا بارامىز. رەسەيدەن تۇركىمەنستانعا كەلىپ، تۇركىمەنباشى، تاشاۋىز، اشحاباد، چاردجوۋ وڭىرلەرىندەگى قازاقتارمەن سۇحباتتاسامىز. ودان كەيىن يرانعا ءوتىپ، قازاق دياسپوراسى ەڭ كوپ شوعىرلانعان گورگان، بەندەر-تۇرىكمەن، تەگەران، مەشحەد قالالارىنا تابان تىرەيمىز. يراننان اۋعانستانداعى كابۋل، قۇندىزدا تۇراتىن قازاقتاردى قامتىپ، تاجىكستانداعى سوعدى وبلىسى، تاۋلى باداحشان قازاقتارىنا جول تارتامىز. تاجىكستاننان كەيىن ءبىزدى وزبەكستان كۇتىپ تۇر. ونداعى شىرشىق، بوستاندىق اۋداندارىندا قازاقتار كوپ. وزبەكستاننان كەيىن قىتايدىڭ موري، باركول، قۇمىل، قاراماي، شاۋەشەك، قۇلجاعا بارۋدى جوسپارلاپ، ەكسپەديتسيامىزدى موڭعوليانىڭ بايان- ولگەي ايماعىندا اياقتايمىز»، - دەيدى و. بەركىنبايەۆ.
ەسكە سالا كەتسەك، 2017-جىلدىڭ 22-25- ماۋسىم كۇندەرى استانادا دۇنيەجۇزى قازاقتارى قاۋىمداستىعىنىڭ V قۇرىلتايى ءوتتى. قۇرىلتايعا الەمنىڭ 39 ەلىنەن 400 گە جۋىق قانداستارىمىز قاتىستى.
اۆتور: ايجان سەرىكجان قىزى
