قانات يسلامنىڭ كەلەسى قارسىلاسى برەندون كۋك تۋرالى نە بىلەمىز؟

boxrec.com سايتىنداعى مالىمەتتەرگە قاراساق، برەندون كۋك ءبىرىنشى ورتا سالماقتا 1850 كاسىپقوي بوكسشىنىڭ ىشىندە 94 ۇپايمەن 18 ورىندا تۇر. بۇل رەيتينگىدە قانات يسلام مەكسيكالىق نوربەرتو گونسالەستى جەڭگەننەن كەيىن 82 ۇپاي جيناپ، 23- ورىنعا جايعاسقان.

WBA جانە IBF تۇجىرىمدارىنىڭ ماۋسىم ايىنىڭ جاڭارتىلعان رەيتينگىسىندە وتانداسىمىز ۇزدىك ۇشتىكتى قورىتىندىلاسا، كانادالىق WBA رەيتينگىندە 5- ورىن، IBF رەيتينگىندە 6- ورىندى قاناعات ەتىپ وتىر.

برەندون كۋك اۋەسقوي بوكستا 32 جەكپە-جەك وتكىزگەننەن كەيىن، مايك گيەتت اتتى جاتتىقتىرۋشىنىڭ ىقپالىمەن 2011-جىلدىڭ 19- اقپانى كۇنى كاسىپقوي بوكستاعى العاشقى قادامىن باستادى، بوكستاعى لاقاپ اتى «Bad Boy».

كانادالىق وسى ۋاقىتقا دەيىن 18 كەزدەسۋ وتكىزىپ، 11 قارسىلاسىن نوكاۋتقا جىبەرگەن. جەكپە-جەكتەرىنىڭ بارلىعى تۋعان ەلى كانادادا وتكەن. كۋك كاسىبي رينگتە ءبىرىنشى ورتا سالماقتا كانادا چەمپيونى، WBA NABA نۇسقاسى بويىنشا كانادا چەمپيونى، WBA Inter- Continental جانە NABA بەلدىگىن جەڭىپ العان.

ايتا كەتەيىك، قانات يسلام 26- مامىر كۇنى ا ق ش- تىڭ فلوريدا قالاسىندا وتكىزگەن كەزەكتى جەكپە-جەگىندە مەكسيكالىق نوربەرتو گونسالەستى (23-8,13 كو) 12 راۋندتا ۇپاي ايىرماشىلىعىمەن جەڭىپ، ءبىرىنشى ورتا سالماقتاعى WBO NABO جانە Inter- Continental, WBA Fedelatin جانە Inter- Continental تيتۋلىنىڭ يەگەرى اتانعان بولاتىن.

بۇعان دەيىن حابارلاعانىمىزداي، وليمپيادا چەمپيونى، ۆەل باركەر كۋبوگىنىڭ يەگەرى باحتيار ارتايەۆ برەندون كۋكتى «قاناتقا لايىق قارسىلاس» دەپ پىكىر بىلدىرگەن.

ەسكە سالا كەتەيىك، استاناداعى ەكسپو-2017 كورمەسى اياسىندا وتەتىن كاسىپقوي بوكس كەشى 9- قىركۇيەكتە «سارىارقا» ۆەلوترەگىندە وتەدى. بوكس كەشىندە قاناتتان بولەك تاعى 9 قازاقستاندىق بوكسشى ونەر كورسەتەدى دەپ كۇتىلۋدە.

اۆتور: مۇحتار قاليموللا ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى