وسكەمەن اسپانىن تاعى دا تۇنەرگەن بۇلت تورلادى
بۇعان دەيىن قازگيدرومەت بولجامى بويىنشا 19- شىلدە كۇنى شىعىس قازاقستان وبلىسىندا جەلدىڭ ۇيىتقۋى سەكۋندىنا 25 مەترگە دەيىن ارتاتىندىعى ەسكەرتىلگەن حابارلاما تاراتىلعان بولاتىن.
بۇدان وزگە، مەتەورولوگتار نايزاعاي جارقىلداپ، بۇرشاق جاۋۋى مۇمكىن ەكەندىگىن دە ەسكەرتكەن. سينوپتيكتەر بولجامى ءدال كەلدى. قازىر كوممۋنالدىق قىزمەتتەر داۋىل كەزىندە تامىرىمەن وپىرىلىپ تۇسكەن تالدار مەن مەتالل قۇرىلىمدارىنان قالانى تازارتۋ جۇمىستارىن جالعاستىرىپ جاتىر.
ەنەرگەتيكتەر ەلەكتر بەرۋ جەلىلەرىنىڭ ۇزىلگەن تۇستارىن جويۋدا. ارنايى قۇرىلعان وبلىستىق كوميسسيا كۇتپەگەن اپات سالدارىنان كەلتىرىلگەن ماتەريالدىق شىعىندار ەسەبىن شىعارۋعا كىرىستى.
ايتا كەتەيىك، «112» جانە «101» جەلىلەرىنە وسكەمەن قالاسى مەن قالا ماڭىنداعى اۋدانداردان وپىرىلعان اعاشتار، قيراعان اۆتوكولىكتەر، قۇلاعان قۇرىلىس زاتتارى، ەلەكتر جەلىلەرىنىڭ ۇزىلگەندىگى جايلى جۇزدەن استام قوڭىراۋ شالىندى. جەتى ادام زارداپ شەگىپ، ولاردىڭ ءبىرى - 82 جاستاعى زەينەتكەر بۇگىن تۇندە قالالىق اۋرۋحانادا كوز جۇمدى.
