ورالدا شەكاراشىلارعا ارنالعان جۇردەك كاتەرى سۋعا ءتۇسىرىلدى - فوتو
سالتاناتتى راسىمگە قاتىسقان باتىس قازاقستان وبلىسىنىڭ اكىمى التاي كولگىنوۆتىڭ اتاپ وتكەنىندەي، اتالمىش زاۋىتتان جىل سايىن كەمە شىعارۋ يگى داستۇرگە اينالدى. ەلىمىز تاۋەلسىزدىك العاننان بەرگى شيرەك عاسىر ىشىندە 25 كەمە شىعارىلسا، بيىل ولاردىڭ قاتارىنا تاعى ەكەۋى قوسىلدى. مۇنىڭ ءبىرى سۋ ىعىستىرىلىمى 250 توننالىق كەمە بولسا، بۇگىنگى جۇردەك كاتەر (27 توننالىق) ساعاتىنا شامامەن 100 شاقىرىمداي جۇزە الادى.
وسىنىڭ ءبارى ەلباسىنىڭ تاپسىرماسىنا سايكەس قولعا الىنعان ۇدەمەلى يندۋستريالاندىرۋ جانە يننوۆاتسيالىق دامۋ باعدارلاماسى اياسىندا ءوندىرىس ورىندارىن جاڭعىرتۋ باعىتىندا جۇزەگە اسىرىلۋدا. ق ر ۇ ق ك شەكارا قىزمەتىنىڭ تاپسىرىسىنا سايكەس «زەنيت» زاۋىتى FC-19 كاتەرىن دە قازىرگى زامانعى بارلىق تالاپتارعا ساي جاساپ شىعاردى. بۇل ەلىمىزدىڭ شەكارا قىزمەتىنىڭ 25 جىلدىعىمەن تۇسپا- تۇس كەلىپ وتىر. ەندى ول ارنايى سىناقتان وتكىزىلگەننەن كەيىن كاسپي تەڭىزىندە ەل تىنىشتىعىن كۇزەتۋگە سەپتەسەتىن بولادى. ايتا كەتەيىك، جىلدام ءجۇزىپ، تەز بۇرىلاتىن اتالمىش كاتەر وزەنگە دە كىرە الادى. ول، اسىرەسە، زاڭسىز بالىق اۋلاۋمەن اينالىساتىن براكونەرلەرمەن كۇرەس جۇرگىزۋدە ءتيىمدى.
