اتامقۇلوۆ زىمىران بولشەكتەرى قۇلايتىن اۋدان اقساقالدارىمەن كەزدەسۋگە ۋادە بەردى
بۇل تۋرالى بۇگىن ۇكىمەت وتىرىسىنان كەيىن ب ا ق وكىلدەرىنە ق ر قورعانىس جانە ايروعارىش ونەركاسىبى ءمينيسترى بەيبىت اتامقۇلوۆ ءمالىم ەتتى، دەپ حابارلايدى قازاقپارات.
«بۇل ماسەلە ءالى تۇبەگەيلى شەشىمىن تاپپاسا دا قوعام اراسىندا كوپ كوتەرىلىپ جاتىر. جەرگىلىكتى بيلىكتەن دە بۇل ماسەلەگە قاتىستى حابار كەلدى. شىنىمدى ايتسام، جەر بىزدە 120- اۋدان دەپ ەسەپتەلىنەدى. ال جەردىڭ كولەمىن ناقتى ايتا المايمىن. سەبەبى زىمىراندى عارىشقا ۇشىرار كەزدە ونىڭ بۇكىل تراەكتورياسى، بولشەكتەرى قاي جەرگە تۇسەتىندىگى ەسەپتەلىنەدى. بۇل وتە اۋقىمدى جۇمىس بولعاندىقتان زەرتەۋ شارالارى اياقتالعاننان كەيىن عانا زىمىران بولشەكتەرى قۇلايتىن اۋداننىڭ كولەمىن ەسەپتەپ شىعارامىز»، - دەدى ول.
ءمينيستردىڭ دەرەگىنشە، ءار زىمىراننىڭ 2 ساتىدا جەرگە قۇلايتىن 4 بولشەگى بولادى. ماسەلەن، 60 جىلدىڭ ىشىندە 1500 زىمىران اسپانعا كوتەرىلگەن. ياعني، وسى جىلداردىڭ ىشىندە زىمىراننىڭ 6 مىڭ بولشەگى جەرگە قۇلاعان. ونىڭ ىشىندە ءبىرىنشى ساتىداعى بولشەكتەر عانا قازاقستان جەرىنە تۇسەدى. ەكىنشى ساتىدا بولشەكتەر رەسەيدىڭ التاي، ءسىبىر اۋماعىنا قۇلايدى. جەرگە تۇسكەن زىمىران بولشەكتەرى ءبىر كۇننىڭ ىشىندە جيناپ الىنىپ، جويىلادى.
«جالپى بۇل ماسەلە مەنىڭ باقىلاۋىمدا. وتكەندە سول اۋدان اقساقالدارىنان حات الدىق. قازىر ناقتى جۇمىستار جۇرگىزىلىپ جاتىر. سەبەبى بۇل ۇكىمەتتىڭ جەرى، ونى «بايتەرەك» بىرلەسكەن كاسىپورىنى ۋاقىتشا جالعا العان. قازىر ءبىز ول جەر قالاي پايدالانىلىپ جاتىر، قانشا پايدا اكەلدى دەگەن ماسەلەلەردىڭ ءبارىن ەسەپتەۋىمىز كەرەك. ماسەلەن، بيىل 6 ايدا «بايقوڭىردى» جالعا بەرۋدەن 18 ميلليارد تەڭگە اقشا بيۋدجەتىمىزگە ءتۇستى. وتكەن جىلدىڭ سوڭىندا 12 ميلليارد تۇسكەن ەدى. دەمەك، ءبىر جىلدىڭ ىشىندە 30 ميلليارد تەڭگە الدىق. مۇنىڭ بارلىعى ەلىمىزدىڭ بيۋدجەتىنە ءتۇسىپ، ەكونوميكامىزدى كوتەرۋگە جۇمسالۋدا»، - دەدى بەيبىت اتامقۇلوۆ.
ءمينيستردىڭ ايتۋىنشا، زىمىران بولشەكتەرى قۇلاۋى مۇمكىن اۋدان ەگىندىك، سۋارمالى جەر ەمەس.
«كوكتەمدە، جەر كوكتەگەندە مال جايىلۋعا شىعادى. ال مامىر ايىنان ول جەردىڭ ءشوبى كۇيىپ كەتەدى. توڭىرەگىنىڭ ءبارى تۇزدى. قازىر ءبىز سول جەردى كىم، قالاي پايدالاناتىنىن زەرتتەپ جاتىرمىز. مەنىڭ ورىنباسارىم نۇرعوجين جۇمىس توبىن باسقارۋدا. ماماندارىمىز سول جەردى زەرتتەۋدە. سودان كەيىن ءوزىم بارىپ، حالىقپەن، اقسالدارمەن كەزدەسەمىن، تۇسىندىرەمىن»، - دەپ ۋادە بەردى مينيستر.
اۆتور: مارلان جيەمباي
