العاشقى قولشاتىرلار قانداي ەدى؟
باستاپقىدا مۇنداي كەرەمەت تەك باي-باعلاندار مەن شەندى-شەكپەندىلەردە عانا بولعان ەكەن. بامبۋك اعاشىنان جاسالىپ، كەرەك تارتقان جىبەك ماتاعا باعالى اسىل تاستار تىگىلگەن ءساندى بۇيىم ءوز يەسىنىڭ ءال-اۋقاتىنان حابار بەرگەن. ب. ز. د Ⅺ عاسىردا پاتشالار مەن اقسۇيەكتەردىڭ سوڭىنان سالماعى ەكى كەلىدەي، ال ديامەترى 1,5 مەتر بولاتىن قولشاتىر كوتەرىپ، ءبىر توپ قىزمەتشى ەرگەن.
ال ەگيپەت پەن ۆاۆيلون، ءۇندىستاندا بيلىكتىڭ سيمۆولىنا يە بولعان قولشاتىردى قولدانۋ قۇقىعى تەك پاتشا اۋلەتىنىڭ مۇشەلەرىندە بولعان.
قولشاتىردى جاڭبىردان قورعانۋ ءۇشىن العاش رەت 1750 -جىلى لوندون تۇرعىنى د. حەنۆەي كوشەگە ۇستاپ شىققان. بۇل كورىنىس قولشاتىردىڭ بۇرىنعى دارەجەسىن ءتۇسىرىپ، كۇلكىگە اينالدىرعانداي كورىندى. ال 1873 -جىلى اعىلشىندىق سەميۋەل فوكس قولشاتىرعا جاڭا ءومىر سىيلاپ، كولەمىن وزگەرتىپ، پاتەنت الدى. وسىدان باستاپ بۇكىل حالىق قولىنا قولشاتىر ۇستايتىن بولدى.
قولشاتىر تاڭداعاندا...
بۇگىندە قولشاتىردىڭ كولەمى، ءپىشىنى، ءتۇر-ءتۇسى، ديزاينى، جاسالعان ماتەريالى، ءتىپتى سالماعىنا قاراي سان الۋانىن تاباسىز. تەك سولاردىڭ ىشىنەن قالاۋىڭىزعا ساي كەلەتىنىن دۇرىس تاڭداي بىلسەڭىز بولعانى.
قۇرىلىسىنا نازار اۋدارىڭىز.
ونىڭ مەحانيكالىق (قولمەن اشىلاتىن)، جارتىلاي اۆتوماتتى (باتىرمانى باسا وتىرا جوعارى قاراي قولمەن اشاسىز) ، اۆتوماتتى (تەك تۇيمەنى باسساڭىز بولعانى)، ەكى ەسەلى اۆتوماتتى (تۇيمەنى باسۋ ارقىلى تەك اشىلىپ قانا قويماي، جابىلادى دا) دەگەن تۇرلەرى بولادى.
بەرىك بولۋىن قاداعالاڭىز.
ەگەر قولشاتىردىڭ عۇمىرى ۇزاق بولسىن دەسەڭىز، ونىڭ قاڭقاسى بەرىك تەمىردەن، بولاتتان بولعانى دۇرىس (ءبىراق بۇگىندە جۇرتتىڭ كوبى سالماعىنا قاراپ، جەڭىلىن تاڭدايدى دا قاڭقاسى ارنايى اليۋمينييدەن جاسالعان alu light قولشاتىرىن الىپ جاتادى. ونىڭ سالماعى - 200 گ). ال قاپتاماسى نەيلون، پونچ، پوليەستەر سىندى سينتەتيكالىق ماتەريالداردان بولۋى كەرەك. ولار جاڭبىر سۋىن بويىنا سىڭىرمەيدى جانە تەز قۇرعايدى. قاپتامانى كەرىپ تۇرعان تارماقتار (نەگىزى، 8 تارماق بولۋى كەرەك) دۇرىس ءپىشىندى كۇمبەز ءتۇزىپ، قاپتامانىڭ بىرنەشە جەرىنەن بەكىتىلگەن بولسىن. وسىنىڭ ءبارىن قاراعاننان كەيىن قولشاتىردى ەكى- ءۇش رەت اشىپ- جاۋىپ بەرىكتىگىن، مەحانيزمىن سىناپ كورىڭىز. جىڭىشكە تاياقتى، جينالمالى قولشاتىرلار جەلدى كۇنى تەز مايىسىپ. سىنىپ قالۋى مۇمكىن.
ءپىشىنى دە ەسكەرىلۋى كەرەك.
دەنە بىتىمىڭىزگە، ءتىپتى جاس مولشەرىڭىزگە وراي قولشاتىردىڭ ءپىشىنىن دۇرىس تاڭداڭىز.
كولەمىنە قاراڭىز.
بويىڭىز الاسا، تولىق بولساڭىز، قولشاتىرىڭىزدىڭ كولەمدى بولماعانى ءجون. سونداي- اق دەنەلى جانداردىڭ قولىنا ۇستاعان قولشاتىرى وزىنە ساي بولعانى دۇرىس. كولەمى ۇلكەن، سالماقتى قولشاتىرلار بالانىڭ قولىن تەز تالدىراتىنىن ۇمىتپاڭىز. ديزاينىنا ءمان بەرىڭىز. قاراپايىم قولشاتىردى مىڭ قۇبىلتىپ، ءسان بەرگەن ديزاينەرلەردىڭ قيالىندا شەك بار ما؟ ! بۇگىندە كوڭلىڭىزگە قونىمدى قولشاتىردى تاباتىنىڭىزعا ەش كۇمانىڭىز بولماسىن. قولعا ۇستايتىن ءتۇرىن قالاماساڭىز، باسىڭىزعا تەلپەك سياقتى كيىلەتىنىن نەمەسە بۇكىل دەنەڭىزدى جاۋىپ تۇراتىنىن قاراپ كورىڭىز. ول كوڭلىڭىزدەن شىقپاسا ارقاعا اسىلاتىن سومكەنىڭ ىشىنەن شىعىپ تۇراتىن قولشاتىرلاردىڭ دا بار ەكەنىن ەسىڭىزگە سالامىز.
سۇيىكتى ەرتەگى كەيىپكەرلەرىنىڭ بەينەسىندەگى، كۇلىمدەگەن كوزدەرى نەمەسە قوزعالىپ تۇراتىن قاناتى بار قولشاتىرلار بالالاردى قۋانىشقا بولەرى انىق. ال ءوزىڭىزدى گۇل، كوبەلەك سىندى نازىكتىك سيمۆولى، اسىل تاستارى، ادەمى بەدەرى بار ءساندى قولشاتىرمەن قۋانتىڭىز. كيگەن كيىمىڭىزگە ۇيلەستىرە قولشاتىردىڭ ءبىر ەمەس، بىرنەشە ءتۇرىن الىپ قويىڭىز. جاڭبىرلى كۇنى باسىڭىزعا كۇلاپارا كيگەنشە سونداي قولشاتىردىڭ ءبىرىن ۇستاپ، ءساندى كورىنىڭىز.
