وبلىس اكىمى جالعىزباستى قارت انانىڭ اۋىر جاعدايىن ءوز كوزىمەن كوردى
پاۆلودار اۋدانىنا جاساعان جۇمىس ساپارى بارىسىندا شاقات اۋىلدىق وكرۋگىنە قاراستى تولىباي اۋىلىندا جەرگىلىكتى تۇرعىندار بولات باقاۋوۆتان ءۇيى ورتەنگەن قارت اناعا جاردەمدەسۋىن سۇرادى. تۇرعىنداردىڭ ايتۋىنشا، زەينەتكەر ۇزاق جىلدار بويى ساۋىنشى بولىپ جۇمىس ىستەگەن. جالعىز باستى قارت انا وتكەن جىلى ورتتەن كەيىن ەلەكتر قۋاتىنان ايىرىلعان.
اۋىلداستار قارياعا مۇمكىندىگىنشە كومەكتەسىپ تۇرادى. جاستار قىستىڭ كۇنى اۋلاداعى قاردى كۇرەپ بەرسە، كاسىپكەرلەردىڭ ءبىرى وعان ءبىر جىلدىق كومىرىن الىپ بەرگەن. توبەدەن سۋ تامشىلايتىن ەسكى ۇيدە قىستىڭ ايازدى كۇندەرى وتە سالقىن بولاتىن.
ايتا كەتەيىك، بارلىق جاعدايدى بولات باقاۋوۆ اۋدان اكىمى الەكساندر بابەنكو مەن شاقات اۋىلىنىڭ اكىمى بازارباي اليەۆ ەمەس، تۇرعىندار ايتىپ بەرگەن. وبلىس اكىمى اۋىر جاعدايدا ءومىر ءسۇرىپ جاتقان قاينىكەش اققالۋوۆانىڭ ءۇيىن ءوز كوزىمەن كورىپ، كەيۋانانىڭ قيىن جاعدايىنا كۇيزەلىسىن جاسىرا المادى.
وبلىس اكىمى جەرگىلىكتى اكىمنىڭ قول قۋسىرىپ وتىرعانى ءۇشىن ايىپتاپ، اۋدان اكىمى الەكساندر بابەنكوعا الەۋمەتتىك قىزمەت وكىلدەرىمەن بىرلەسىپ قارت اناعا جاعداي جاساۋىن تاپسىردى. سونىمەن بىرگە، ول جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنا جالعىزباستى تۇرعىنداردىڭ جاعدايىن انىقتاپ، قاراۋسىز قالدىرماۋدى تاپسىردى. فوتو: pavlodarnews.kz.
