قىزىلوردالىق عالىمدار كۇرىش قاۋىزىن قۇرىلىسقا پايدالانباق
جىل سايىن سىر وڭىرىندە شامامەن 40 مىڭ توننا كۇرىش قاۋىزى وندىرىستىك قالدىق رەتىندە قاجەتكە جاراماي قالاتىن. ال ، سىربويىلىق عالىمدار وسى كۇرىش قاۋىزىنان اربوليت جاساۋعا بولاتىنىن ايتادى. بۇل ءادىس جەڭىل بەتون وندىرىسىندەگى ءداستۇرلى تەحنولوگيامەن سالىستىرعاندا ءبىرشاما ارزان ءارى ەكولوگيانى ساۋىقتىرۋدا پايداسى وراسان.
«جەرگىلىكتى ارزان شيكىزاتتاردى قولدانامىز. ياعني جىلۋ ورتالىعىنىڭ كۇلىن، سونىمەن قاتار ءارتۇرلى حيميالىق قوسپالار، سۇيىق شىنى، كالتسي حلوريدى. سولاردىڭ مولشەرىن ءبىز ەكى ەسە ازايتىپ، ءاربوليتتىڭ وزىندىك باعاسىن تومەندەتتىك. ال تەحنيكا عىلىمدارىنىڭ كانديداتى ءنابي داۋجانوۆ تەمىربەتون بۇيىمدارىن ءوندىرۋشى كاسىپورىندار شىعىنىن ازايتۋدىڭ جولىن ۇسىنىپ وتىر. ياعني بەتون قۇيماسىن كەپتىرۋ كەزىندە كۇن ەنەرگياسى پايدالانىلادى. ول ءۇشىن ارنايى گەليوقاقپاق ويلاپ تابىلدى»، - دەيدى تەحنيكا عىلىمدارىنىڭ دوكتورى ساكەن ۇدەربايەۆ.
جەرگىلىكتى عالىمدار مۇناي بۇرعىلاۋ كەزىندە شىعاتىن قالدىقتاردى دا پايدالى ىسكە باعىتتاۋعا بولاتىنىن ايتادى. ادەتتە توننالاپ كومىر شىعىندالاتىن كەرامزيت وندىرىسىنە ەندى «قارا التىن» قالدىقتارىن قولدانعان ءجون.
«الىنعان تەحنولوگيانى ءبىز ورال قالاسىنداعى كەرامزيت زاۋىتىندا تاجىريبەلىك سىناقتان وتكىزدىك. ول زاۋىتتا اكرەديتتەلگەن زەرتحانا بار. سول زەرتحانا ءبىزدىڭ الىنعان كەرامزيتىمىزدىڭ قۇرامىنا سەرتيفيكات سايكەستىگىن بەردى. ياعني مەملەكەتتىك ستاندارتقا بارلىق فيزيكالىق- مەحانيكالىق قاسيەتتەرى بويىنشا ساي كەلەدى»، - تەحنيكا عىلىمدارىنىڭ كانديداتى روزا نارمانوۆا.
«قورقىت اتا» اتىنداعى قىزىلوردا مەملەكەتتىك ۋنيۆەرسيتەتىنىڭ زەرتحاناسىندا ءبىرقاتار تىڭ تەحنولوگيالار ءالى دە سىنالىپ جاتىر. باستى ماقسات - ەنەرگيا جانە رەسۋرس ۇنەمدەۋ تاسىلدەرىن جەتىلدىرىپ، وتاندىق ءوندىرىستىڭ وركەندەۋىنە جول اشۋ.
اۆتور: ەلۋباي اۋەزوۆ
