ۇلتتىق اككرەديتتەۋ ورتالىعى وتاندىق ءونىمدى شەتەلدە ىلگەرىلەتۋگە سەپتىگىن تيگىزەدى
دەپ حابارلايدى قازاقپارات.
«بۇگىنگى كۇنى ۇلتتىق اككرەديتتەۋ ورتالىعىندا 1445 سۋبەكتى اككرەديتتەلگەن. ونىڭ ىشىندە 89 ونىمدەر مەن كورسەتىلەتىن قىزمەتتەردىڭ سايكەستىگىن راستاۋ ورگانى، 73 مەنەدجمەنت جۇيەسى بويىنشا سايكەستىتىگىن راستاۋ ورگانى، 800 سىناق زەرتحاناسى، 401 سالىستىرىپ تەكسەرۋ زەرتحاناسى، 50 كاليبرلەۋ زەرتحاناسى بار. ەستەرىڭىزدە بولسا 2003 -جىلى قازاقستان كاسىپكەرلەرىنىڭ 11- فورۋمىندا ەلباسى شەتەلدە قازاقستاندىق سەرتيفيكاتتاردى تانۋ تۋرالى ماسەلەنى كوتەرگەن ەدى. وسىعان بايلانىستى حالىقارالىق نارىقتا قازاقستاندىق بيزنەستى قولداۋ جانە قورعاۋدىڭ ءتيىمدى تەتىگىن ازىرلەۋگە، شەتەلدە قازاقستاندىق سەرتيفيكاتتى تانۋ بويىنشا جۇمىس جۇمىس جۇرگىزۋگە تاپسىرما بەرىلگەن بولاتىن»، - دەدى ماقسۇت ءومىرحانوۆ.
ونىڭ ايتۋىنشا، قازاقستان پرەزيدەنتىنىڭ تاپسىراسىن ىسكە اسىرۋ ءۇشىن اككرەديتتەۋ جونىندەگى حالىقارالىق ۇيىمدارعا مۇشە بولۋ قاجەت بولدى. ناتيجەسىندە ۇلتتىق اككرەديتتەۋ ورتالىعى 2007 -جىلى ILAC ۇيىمىنا تولىق قۇقىلى مۇشەلىككە وتكەن. ال 2010 -جىلى ILAC MRA قازاقستاندىق ورتالىقتىڭ قول قويۋشىسى بولىپ بەكىدى. مۇنان كەيىنگى جىلدارى PAC تولىق قۇقىلى قول قويۋشى، PAC MLA كەلىسىمنىڭ قول قويۋشىسى، IAF تولىق قۇقىلى مۇشەسى جانە IAF MLA كەلىسىم قول قويۋشىسى بولدى.
«اككرەديتتەۋ جونىندەگى حالىقارالىق ۇيىمعا مۇشە بولۋ ساۋداداعى تەحنيكالىق كەدەرگىلەردى الىپ تاستاۋ، شەتەلدە وتاندىق ءونىمدى ىلگەرىلەتۋ، سايكەستىكتى باعالاۋ جونىندەگى راسىمدەر جۇرگىزۋ كەزىندە قوسىمشا شىعىستاردى تومەندەتۋ ماقساتىندا جاسالدى. ۇزاق ۋاقىت بويى تەر توگىلگەن بۇل جۇمىستاردىڭ ناتيجەسىندە ILAC MRA بەلگىسىمەن سىناق حاتتاماسى جانە IAF MLA بەلگىسىمەن سايكەستىك سەرتيفيكاتى الىندى» ، - دەدى ول.
باس ديرەكتوردىڭ ايتۋىنشا، بۇگىندە ۇلتتىق اككرەديتتەۋ ورتالىعىمەن 198 زەرتحانا شارت جاساسقان جانە ولار ILAC MRA زەرتحانالىق بىرىكتىرىلگەن بەلگىسىن پايدالانۋعا قۇقىق الىپ وتىر. اتالعان زەرتحانالار قازاقستاننىڭ زاڭدى تۇلعالارىنا 570 114 سىناق حاتتامالارىن، ونىڭ 10492- ءسىن قازاقستان اۋماعىنان تىسقارى جەردە بەرگەن.
«سىناق حاتتامالارى بالىق جانە بالىق ونىمدەرىنە، ەت جانە ەت ونىمدەرىنە، شۇجىق ونىمدەرىنە، ءسۇت جانە ءسۇت ونىمدەرىنە، ارا بالىنا، بيداي ونىمدەرىنە، جۇگەرى، ۇنعا، كۇنباعىس، سويا، راپس جومىنا، قوي جۇنىنە، ءىرى قارا مال تەرىسىنە، سونىمەن قاتار تابيعي جانە مينەرالدى ەمدىك- اسحانا سۋلارىنا بەرىلدى. ونىمدەر قىرعىزستان، تاجىكستان، وزبەكستان، اۋعانستان، قىتاي، جاپونيا، يران، سەربيا، يسپانيا، رەسەي، بەلارۋس، ازەربايجان، گرۋزيا، پولشاعا ەكسپورتتالادى» ، - دەدى ول.
ونىڭ دەرەگىنشە، IAF MLA بىرىكتىرىلگەن بەلگىسىن پايدالانۋ 53 ۇيىمعا رۇقسات ەتىلگەن. جالپى IAF MLA بىرىكتىرىلگەن بەلگىسىمەن 10335 سايكەستەندىرۋ سەرتيفيكاتى بەرىلگەن.
اۆتور: مارلان جيەمباي
