قانات يسلام: قازاقستان - بوكس الەمىندە مويىندالعان دەرجاۆا
«مەن ءۇشىن، جالپى «استانا ارلاندارى» كلۋبىنىڭ بارلىق جانكۇيەرلەرى ءۇشىن كۋبالىقتاردان باسىم ءتۇسۋ وتە قۋانىشتى ءارى ايتۋلى وقيعا سانالادى. بوستاندىق ارالدارى وكىلدەرىنە 2-5 ەسەبىمەن ەسە جىبەرە تۇرىپ، ءبىزدىڭ جىگىتتەر قولدارىن تومەن تۇسىرگەن جوق جانە كەزدەسۋدى جەڭىسپەن اياقتاي الدى. نۇرلان اقۇرپەكوۆ باستاعان باپكەرلەر شتابى سپورتشىلارمەن جاقسى جۇمىس ىستەپ، ءوز شاكىرتتەرىن پسيحولوگيالىق تۇرعىدا جىگەرلەندىرە الدى. ءوز اتىمنان جانە Qazaq promoutions پروموۋتەرلىك كومپانياسى اتىنان بارشا قازاقستان حالقىن شىن مانىندە تاماشا جەڭىسپەن قۇتتىقتايمىن»، - دەدى كاسىبي بوكس الەمىندە «قازاق» لاقاپ اتىمەن تانىلعان بىلعارى قولعاپ شەبەرى.
قانات يسلامنىڭ ايتۋىنشا، بۇل جەڭىس قازاقستاننىڭ بوكس الەمىندە مويىندالعان دەرجاۆا ەكەندىگىن كەزەكتى مارتە قۋاتتاي تۇسەدى. اسىرەسە، ولجاس بالنيازوۆتىڭ ەسەپ تەڭ بولىپ تۇرعان ساتتە شەشۋشى ايقاسقا شىعىپ، ازۋلى كۋبالىق قارسىلاسى فرەنك زالديۆاردى قاپى قالدىرۋىن ايرىقشا اتاپ ءوتۋ قاجەت.
«ءاربىر بوكسشى جىلى سوزدەرگە لايىقتى دەڭگەيدە ونەر كورسەتتى. دەگەنمەن، بارلىق جاۋاپكەرشىلىك جۇگى موينىنا ارتىلعان ولجاس باينيازوۆقا وڭاي تۇسكەن جوق. ءبىراق، ول ءوز شەبەرلىگىن، ەرىك-جىگەرىن تانىتا وتىرىپ، قاجەتتى ناتيجەگە قول جەتكىزدى. قازاقستاندىقتار وتە مىقتى بىلعارى قولعاپ شەبەرلەرىمەن جەكپە-جەكتە جەڭىسكە جەتىپ وتىرعانىن ەستە ساقتاۋ قاجەت. ويتكەنى، كۋبالىقتاردىڭ ساپىندا وليمپيادا ويىندارىنىڭ، الەم چەمپيوناتتارىنىڭ، سونىمەن قاتار باسقا دا ايتۋلى جارىستاردىڭ بىرنەشە دۇركىن جەڭىمپازدارى ءارى جۇلدەگەرلەرى بولدى»، - دەدى قانات يسلام.
سونىمەن قاتار ول بوكسشىلارىمىزدىڭ كۋبالىقتارعا قارسى ماتچتا جەڭىسكە جەتۋگە دەگەن قۇلشىنىستارى زور بولعاندىعىن اتاپ ءوتتى. ء«تىپتى بوكس اۋىلىنان الىس ادامداردىڭ وزدەرى دە ءبىزدىڭ بوكسشىلارىمىزدىڭ جەڭىسكە جەتۋ جولىنداعى ەڭ جوعارى ەرىك-جىگەرىنە ءتانتى بولدى»، - دەدى ول.
ەستەرىڭىزگە سالساق، قانات يسلام ءبىر كەزدەرى «استانا ارلاندارى» كومانداسىنىڭ كاپيتانى بولعان دا ەدى. بۇگىندە كاسىبي بوكستا جۇرگەن ول WBA Inter- Continental, WBO NABO (WBO Inter- Continental: WBA Fedelatin جانە 1- ورتا سالماق ساناتىندا WBA Fedecaribe) نۇسقالارى بويىنشا الەم چەمپيونى اتاعىنا يە. ول سوڭعى جەكپە-جەگىندە مەكيسكالىق بوكسشى نوربەرتتو گونسالەسكە قارسى شىعىپ، جەڭىسكە جەتكەن بولاتىن.
