جاس ونەرتاپقىش استانا اكىمدىگىنە كوكتايعاقپەن كۇرەسۋدىڭ امالىن ۇسىندى
ونىڭ ستارتاپ-يدەياسى استانا اكىمشىلىگى ۇيىمداستىرعان Sturtup Weekend بايقاۋىندا ەكىنشى ورىن الدى جانە 150 مىڭ تەڭگە سىياقىعا يە بولدى.
«بۇل دوڭگەلەكتەرى بار كوگال شاپقىش ءتارىزدى قۇرىلعى. مۇزجارعىش ماشينا قۇرىلىس سالاسىنا قولدانىلاتىن وپىرعىش بۇرعى نەگىزىندە جاسالعان جانە ادامنان ءۇش ەسە جىلدام جۇمىس ىستەيدى. بۇگىنگى قۇرىلعىمنىڭ ماماندىعىما ەش قاتىسى جوق، ءوزىم بيولوگيا پانىنەن ساباق بەرەمىن. ءبىراق، ءدال وسى ماسەلەنىڭ شەشىمىن تاپقىم كەلدى، سەبەبى، وتكەن جىلى اعام كوكتايعاقتا قۇلاپ، قولىن سىندىرىپ الدى. بۇل وتە وزەكتى ماسەلە، قانشاما قارتتار قىس مەزگىلىندە قۇلاپ، ۇرشىق بۋىندارىن زاقىمداپ جاتىر»، - دەيدى ن. مانسۇروۆ.
ونىڭ ايتۋىنشا، بۇل جاڭالىق ەڭ الدىمەن، ءومىر ساپاسىن جاقسارتۋعا باعىتتالعان. سونىمەن بىرگە، قالالىق بيۋدجەتتىڭ قاراجاتىن ۇنەمدەۋگە سەپتىگىن تيگىزەدى.
بىرىنشىدەن، تروتۋارلارداعى كەسپە تاستارعا زاقىم كەلۋ وقيعالارى ازايادى، سايكەسىنشە ولاردى ءجيى اۋىستىرۋ قاجەتتىلىگى تۋىندامايدى.
ەكىنشىدەن، جۇمىسشىلار سانىن قىسقارتۋعا بولادى. «كوممۋنالدىق قىزمەتتەر مۇز جارۋعا قولداناتىن سۇيمەندەر تروتۋارداعى تاس توسەمەلەرگە ەداۋىر زاقىم كەلتىرەدى. استانادا قىس مەزگىلىنىڭ ۇزاققا سوزىلاتىنى دا بەلگىلى. ماسەلەن، ءسىز 6 جۇمىسشىعا 100 مىڭ تەڭگەدەن تولەيسىز، قۇنى شامامەن 200 مىڭ تەڭگە بولاتىن مەنىڭ قۇرىلعىممەن ەكى-ءۇش جۇمىسشى ءۇش ەسە جىلدام جۇمىس ىستەي الادى. ياعني، قىستىڭ سۋىعىندا مۇنشاما كوپ ادامدى جۇمىسقا جەگۋدەن قۇتقارۋ مۇمكىندىگى بار»، - دەپ ءتۇسىندىردى ول.
Sturtup Weekend بايقاۋىندا ءبىرىنشى ورىن مەن 250 مىڭ تەڭگەنى Sun Project كومانداسى جەڭىپ الدى. لومونوسوۆ اتىنداعى م م ۋ قازاقستانداعى فيليالىنىڭ تۇلەكتەرى كۇن باتارەيالارى مەن جارىق ديودتار نەگىزىندەگى كوشەنى جارىقتاندىرۋ كوزدەرىن ۇسىندى. وسىلايشا، جاس ونەرتاپقىشتار استانا ماڭىندا ورنالاسقان كوكتال، لەسوزاۆود كوشەلەرىندەگى جارىقتاندىرۋ جانە ەلەكتر ەنەرگياسىن ۇنەمدەۋ ماسەلەلەرىن شەشكىسى كەلەدى.
«جارىقشامدار كۇن ەنەرگياسىن تۇتىنادى، سوندىقتان كادىمگى ەلەكتر ەنەرگياسىنا تاۋەلدى ەمەس. وسىنىڭ ارقاسىندا، تۇنگى ۋاقىتتا ەش شىعىنسىز كوشەنى جارىقتاندىرۋعا بولادى. ءتيىمدى جۇمىس ىستەۋ ءۇشىن كۇن كوزىندە نەبارى 6 ساعات قۋاتتاۋ جەتكىلىكتى»، - دەيدى كوماندا كوشباسشىسى سانات سەيىتوۆ.
ءبىر جارىق ديود بلاستەرىنىڭ قۇنى 60 مىڭ تەڭگە، ال جارىق باعاناسىمەن بىرگە - 80 مىڭ تەڭگەنى قۇرايدى. ءۇشىندى ورىن جانە 100 مىڭ تەڭگە الماتىداعى IT- ۋنيۆەرسيتەتتىڭ ستۋدەنتى ايبەك راحىمعا بەرىلدى.
ول تۇرعىنداردى قايتالاما شيكىزات جينايتىن كومپانيالارمەن بايلانىستىراتىن قوسىمشا ويلاپ تاپتى. كومپانيالاردان كوميسسيا الۋ تابىس ءتۇسىرۋ كوزدەلگەن.
ايتا كەتەيىك، Sturtup Weekend جوباسى استانا قالاسى اكىمدىگىنىڭ Astana Innovations Challenge اۋقىمدى ستارتاپ- مارافونى اياسىندا ۇيىمداستىرىلىپ وتىر. دارىندى جاستاردى قالا ومىرىنە جۇمىلدىرۋدى ماقسات ەتكەن ستارتاپ-مارافون اياسىندا جىل سوڭىنا دەيىن استانادا ەكى حاكاتون جانە ءۇش Sturtup Weekend وتكىزۋ جوسپارلانعان.
اۆتور: ايجان سەرىكجان قىزى
