شىمكەنت مۇناي زاۋىتىنداعى ءىرى ءورتتىڭ سەبەبى بەلگىلى بولدى

ءوڭىردىڭ ەڭبەك ينسپەكسياسى جونىندەگى باسقارما باسشىلىعى ءتىلسىز جاۋ جۇمىسشىلاردىڭ ەڭبەك قاۋىپسىزدىگىن ساقتاماۋى سالدارىنان بولعانىن ايتادى، دەپ حابارلايدى قازاقپارات ح ا ا ءتىلشىسى.

و ق و ەڭبەك ينسپەكسياسى جونىندەگى باسقارمانىڭ ءبولىم باسشىسى اسقار سەيىتقازيننىڭ سوزىنشە، باقيلىق بولعان قىزمەتكەر سول كۇنى جۇمىسىن اتقارۋ بارىسىندا ءتيىستى تالاپتاردى ساقتاماي، وعان نەمقۇرايلىلىقپەن قاراعان.

«جۇمىس ورنىندا قازا بولعان وپەراتورعا باسشىلىق تاراپىنان تاپسىرما بەرىلگەن. الايدا جۇمىسشى قىزمەت ورنىنا كەلگەنىن باسشىلارىنا ايتپاعان. كەلە سالىپ، ارنايى كيىمىن كيمەستەن جۇمىسقا كىرىسىپ كەتكەن. ول ءوز جۇمىسىن بىلگەنىمەن، ءتيىستى تالاپتاردى ساقتاماعان بولىپ تۇر. ونىڭ ۇستىنە، باسشىلارى دا قاداعالاۋ جاعىن ءتيىستى دەڭگەيدە اتقارماعان»، - دەيدى اسقار سەيىتقازين.

قازىرگى تاڭدا ءتيىستى قورىتىندى شىعارعان ارنايى كوميسسيا جاۋاپتى تۇلعالاردى تارتىپتىك جازاعا تارتۋ ءۇشىن ماتەريالداردى قۇقىق قورعاۋ ورگاندارىنا جولداۋدا.

ەسكە سالايىق، وسى جىلدىڭ 23 -ماۋسىم كۇنى «شىمكەنت مۇناي ونىمدەرى» ا ق- نىڭ قويماسىنان ءىرى ءورت شىعىپ، ءبىر جۇمىسشى قازا تاپقان ەدى. مارقۇم بولعان 46 جاستاعى ازامات وسى قويمادا وپەراتور بولىپ جۇمىس ىستەگەن. ءورت سوندىرۋشىلەر جالىنمەن ءبىر تاۋلىككە جۋىق ارپالىستى. وت تۇتانعان جەردە 3 مىڭ توننالىق 9 رەزەرۆۋاردىڭ تورتەۋى بەنزينگە تولى بولعان.

اۆتور: اينۇر اقبايەۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى