نۇرسۇلتان نازاربايەۆ ش ق و شارۋالارىنا كووپەراتسيانىڭ نە ءۇشىن قاجەت ەكەنىن ءتۇسىندىردى

 پرەزيدەنتتىڭ ايتۋىنشا، «ەلىمىزدە قانشاما جەر بار، ال تەرەڭ وڭدەۋدىڭ بولماۋىنان ارزان شيكىزات ساتىپ وتىرمىز». «بيدايدى وڭدەپ، ماكارون ساتۋعا بولادى. ەت، ءسۇت، كوكونىس پەن مايلى داقىلداردى سوڭىنا دەيىن وڭدەمەيمىز. ەلىمىزدە ەت كومبيناتتارى، ءسۇت زاۋىتتارى بار، ءبىراق شيكىزاتتىڭ جوقتىعىنان 40 پايىزعا عانا جۇمىس ىستەپ تۇر. بىزدە شيكىزات جەتەرلىك، ونى اكەلىپ، وتكىزىپ، ءونىم ءۇشىن اقشا الۋ كەرەك. ەگەر كووپەراتسيا قۇرساق، بۇل جۇيە رەتكە كەلەدى. وندىرۋشىلەر مەن تۇتىنۋشىلاردى بايلانىستىرىپ تۇراتىن ۇيىم جۇمىس ىستەيدى»، - دەپ اتاپ ءوتتى مەملەكەت باسشىسى.

قازىر بارشا قازاقستان ارقىلى وتەتىن، قىتايدى باتىس ەۋروپامەن جالعايتىن جول قۇرىلىسى ءجۇرىپ جاتىر. قازاقستان پرەزيدەنتى اتاپ وتكەندەي، بۇل تراسسا - شىعىس قازاقستاندىق اۋىل شارۋاشىلىعى تاۋارلارىن وندىرۋشىلەر ءۇشىن جاڭا مۇمكىندىك. ءدال وسى جول ارقىلى فەرمەرلەر ەلدىڭ ءىرى قالالارىنا ءونىم جەتكىزە الادى.

 ايتا كەتەيىك، بۇگىن شىعىس قازاقستانعا جۇمىس ساپارىمەن كەلگەن نۇرسۇلتان نازاربايەۆ وسكەمەننىڭ سول جاعاسىنداعى جاڭا شاعىن اۋدانداعى جاڭا «نۇرلى جول» ساياباعىن اشىپ، شىلىكتى، بەرەل قورعاندارى مەن ابلايكيت بۋددا عيباداتحاناسىنان تابىلعان 2 مىڭ ارتەفاكت قويىلعان ارحيتەكتۋرالىق كورمەنى تاماشالادى. سونداي- اق، ق ر پرەزيدەنتى قالا جۇرتشىلىعىمەن جانە جاڭا ساياباقتىڭ قۇرىلىسىنا قارجى قۇيعان ءىرى وندىرىستىك كاسىپورىنداردىڭ باسشىلارىمەن اڭگىمەلەستى.

اۋدارما: ايجان سەرىكجان قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى