پاۆلوداردا ورالماندار ماسەلەسى قارالدى
دەپ حابارلايدى pavlodarnews.kz.
قوعامدىق قابىلداۋعا كەلگەندەردىڭ ءبىرى - وزبەكستاننان كوشىپ كەلگەن دينارا سايفۋددينوۆا.
- ءبىز پاۆلودار وبلىسىنا 2015 -جىلى قونىستانىپ، بىلتىر قازاقستاننىڭ ازاماتتىعىن العان ەدىك. ەندى وزبەكستاننىڭ ازاماتتىق پاسپورتىن سول ەلدىڭ قازاقستانداعى ەلشىلىگىنە وسى ءبىر ايدىڭ ىشىندە تاپسىرۋ كەرەك ەكەن. ءبىراق، مەن تۇڭعىش بالاما بوسانۋعا كۇنىم تاياپ وتىرعاندىقتان، الماتىعا بارۋعا جاعدايىم جوق. ال، ءتولقۇجاتتى كەشىكتىرىپ اپاراتىن بولساق، اكىمشىلىك جاۋاپكەرشىلىككە تارتىلىپ، ايىپپۇل ارقالاپ قالمايمىز با؟ ، - دەگەن ساۋالىن جولدادى دينارا.
وبلىستىق ىشكى ىستەر دەپارتامەنتى كوشى- قون پوليتسياسى باسقارماسىنىڭ اعا ينسپەكتورى گۇلستان باتتالوۆانىڭ سوزىنشە، وزبەكستانداعى وزگەرىستەرگە بايلانىستى ءتولقۇجاتتى مىندەتتى تۇردە ازامات ءوزى اپارىپ تاپسىرۋ كەرەك.
- بۇرىن ءبىز كوشىپ كەلگەن اعايىنداردىڭ بارلىعىنىڭ ءتولقۇجاتىن جيناپ الىپ، پوشتامەن جىبەرەتىن ەدىك. كەيىن وزبەكستانداعى كوشى- قونعا بايلانىستى زاڭ وزگەرگەندىكتەن مۇنى قابىلداۋدان باس تارتتى. ەندى ەلشىلىكتىڭ ارنايى پورتالىنا تىركەلىپ قويىپ، جەڭىلدەگەننەن كەيىن ءوزىڭ بارىپ تاپسىرۋدان باسقا امالىڭ جوق. از ۋاقىتقا كەشىككەنىڭ ءۇشىن ايىپپۇل سالۋ مۇمكىن ەمەس، - دەيدى گۇلستان باتتالوۆا.
بيلىك وكىلدەرىنە نازىن ارقالاپ كەلگەن اعايىنداردىڭ ءبىرى - كۇلزاتحان جاناي. موڭعوليادان 2012 -جىلى كوشىپ كەلىپ، مەملەكەت تاراپىنان بەرىلەتىن كوتەرمە جاردەماقىسىن الا الماي ءجۇر.
- ءبىز 2012 -جىلدىڭ قىركۇيەك ايىندا كەلدىك. ال، جەلتوقساننان بەرى كەلگەندەردىڭ بارلىعى الىپ جاتىر. سول ءۇشىن ءالى كۇنگە دەيىن ازاماتتىق الماي، ىقتيارحاتپەن ءجۇرمىز، - دەيدى ول.
وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى كوشى- قون ءبولىمىنىڭ باس مامانى مۇحيت جاقسىلىق ۇلىنىڭ سوزىنشە، بۇل زاڭداعى وزگەرىستەرگە بايلانىستى تۋىنداعان ماسەلە ەكەن. مىسالى، 2012 -جىلدىڭ قىركۇيەگىنە دەيىن كەلگەندەرگە ورالمان مارتەبەسى ءبىر جىلعا بەرىلسە، ودان كەيىن كوشىپ كەلگەن اعايىندارعا ورالمان كۋالىگى بەس جىلمەن بەرىلىپتى. ال، ءبىر جىلمەن العانداردىڭ ۋاقىتى الدەقاشان بىتكەن. سوندىقتان، ورالمان مارتەبەسى سوعان سايكەس بەرىلىپ جاتقانىن ايتادى باس مامان.
