ادىلبەك نيازىمبەتوۆتەي مىقتى بوكسشىمەن كەزدەسكەن ەمەسپىن - كۋبالىق بوكسشى

ەرتەڭ ەلورداداعى «قازاقستان» سپورت كەشەنىندە وتەتىن بۇكىل الەمدىك بوكس سەرياسىنىڭ 7- ماۋسىمىنىڭ شەشۋشى ايقاسىندا «استانا ارلاندارىنا» قارسى شىعاتىن «كۋبا قابىلاندارىنىڭ» بوكسشىسى حۋليو لا كرۋس قازاقستاندىق بوكسشى جايىندا وسىنداي پىكىر ءبىلدىردى، دەپ حابارلايدى قازاقپارات.

ايتا كەتەرلىگى، بۇگىن ەكى كوماندا بوكسشىلارىنىڭ سالماق ولشەۋ ءراسىمى وتكەن بولاتىن. ناتيجەسىندە كۋبالىق حۋليو سەزار لا كرۋس قارسىلاسى ارمان رىسبەكتەن 150 گرامعا اۋىر بولىپ شىقتى. شارا اياسىندا ب ا ق وكىلدەرى ودان ريو وليمپيداسىنىڭ فينالىندا جەڭگەن ادىلبەك نيازىمبەتوۆپەن سالىستىرعاندا ەرتەڭگى قارسىلاسى ارمان رىسبەككە قانداي باعا بەرەتىندىگىن سۇراعان بولاتىن.

«ادىلبەك شارشى الاڭدا، ونىڭ ىشىندە ەڭ ءىرى حالىقارالىق تۋرنيرلەردىڭ شەشۋشى ايقاستارىندا تالاي رەت جۇدىرىق تۇيىستەرگەن بوكسشى. سپورتتىق مانساپ جولىمدا كوپتەگەن قارسىلاسپەن كەزدەستىم. ءبىراق نيازىمبەتوۆتى الەمنىڭ ەڭ ۇزدىك بوكسشىلارىنىڭ ءبىرى رەتىنە ايرىقشا اتاپ وتكىم كەلەدى. ونى ارمان رىسبەكپەن سالىستىرعىم كەلمەيدى. بۇل مەنىڭ تارابىمنان جاسالعان اعاتتىق بولار ەدى. مەنىڭ جۇمىسىم كەز كەلگەن كەزدەسۋدە جەڭىسكە جەتۋ ءۇشىن جۇدىرىقتاسۋ»، - دەدى ول.

سونىمەن قاتار ول ريو وليمپياداسىندا ۆەل باركەر كۋبوگىنىڭ بۇيىرماۋىنا قاتىستى دا ءوز پىكىرىن ءبىلدىردى. «شىنىن ايتسام، كۇتكەن ەدىم. بۇل ا ي ب ا شەشىمى جانە مەن ونى قابىلدايمىن. ەڭ باستىسى، وتانىما التىن مەدالمەن ورالدىم»، - دەدى حۋليو سەزار لا كرۋس.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى