شىمكەنتتىك مۇعالىمدەر جۇمىسقا ەلەكتروندى تۇردە قابىلدانىپ جاتىر
ءبىلىم بەرۋ سالاسىنا ەنگىزىلگەن تىڭ جاڭالىق قالا اكىمىنىڭ ۇيىتقى بولۋىمەن قولعا الىنعان. قازىر ميلليونعا تارتا تۇرعىنى بار قالادا ۇستازدار تەك ەلەكتروندى تۇردە جۇمىس تابۋدا. ولار بۇرىنعىداي قۇجاتتارىن قولتىقتاپ، ءار مەكتەپكە بارماستان-اق ۇيىندە وتىرىپ-اق ورنالاساتىن بولعان.
سەبەبى، «جۇمىسپەن قامتۋ تۋرالى» زاڭ بويىنشا ءاربىر مەكەمە وزدەرىندەگى بوس جۇمىس ورىندارى تۋرالى مالىمەتتى ءۇش كۇن ىشىندە سايتقا سالۋى كەرەك. «مەكەمە بوس ورىن جاريالاعان سوڭ، سايتقا ماماندىعى سايكەس كەلەتىن تۇلعا قۇجاتتارىن ەلەكتروندى تۇردە جىبەرەدى. سايتتا قانداي قۇجاتتار سۇراعانىن سۋرەتكە ءتۇسىرىپ نەمەسە سكانەرلەپ ەلەكتروندى تۇردە جولدايدى. ۇيالى تەلەفون ءنومىرىن كورسەتەدى. سول ۇيالى تەلەفونىنا س م س حابارلاما كەلىپ تۇسەدى»، - دەيدى شىمكەنت قالالىق ءبىلىم ءبولىمىنىڭ باس مامانى قاسىمحان دوسجانوۆ.
قۇجاتتار تاپسىرىلعان سوڭ قوعامدىق ۇيىمدار مەن ءبىلىم ءبولىمىنىڭ قىزمەتكەرلەرىنەن قۇرىلعان ارنايى كوميسسيا ۇمىتكەرمەن سۇحباتتاسۋ جۇرگىزەدى. اڭگىمەلەسۋ بارىسىندا مۇعالىمنىڭ ادامي قاسيەتتەرىنە باعا بەرىلەدى. ءسويتىپ، قيىندىقسىز جۇمىسقا تۇرۋدىڭ مۇمكىندىگى تۋادى. بۇل كۇندە بالا سانى كوپتەپ تىركەلگەن شاھاردا مۇعالىمدەرگە بوس جۇمىس ورىندارى جەتەرلىك ەكەن.
«بىزدە بۇگىندە ورىس سىنىپتارىنا ساباق بەرەتىن ءپان مۇعالىمدەرىنە سۇرانىس جوعارى دەپ ايتۋعا بولادى. ورىس ءتىلدى باستاۋىش سىنىپتارعا بۇگىندە 210 مۇعالىم كەرەك. باسقا دا حيميا، بيولوگيا، ماتەماتيكا بويىنشا ورىس سىنىپتارىنا مۇعالىم بولام دەۋشىلەر بولسا، بۇگىنگى كۇنى ورىن وتە كوپ»، - دەيدى شىمكەنت قالالىق ءبىلىم ءبولىمىنىڭ باسشىسى جانات تاجيەۆا.
ءوز كەزەگىندە جاڭا ءتاسىل جاس ماماندار ءۇشىن قانداي بوس ورىندار بار ەكەنىن كورسەتەتىن اقپارات الاڭى سانالىپ وتىر. ەڭ باستىسى - اشىق، انىق جانە ادامي فاكتور جوق.
اۆتور: اينۇر اقبايەۆا
