ينتەرنەتتى ءدۇر سىلكىندەرگەن وقۋشى ديماشتان وزۋدى ارماندايدى

 ۆيتاستىڭ «وپەرا 2» ءانىن ورىنداعان اقتوبە وبلىسى، بايعانين اۋدانىنىڭ ورتالىعى قاراۋىلكەلدىدە تۇراتىن مۇحامبەتالي قالاۋوۆ قازاقستاندىقتاردىڭ ىقىلاسىنا بولەنۋدە. جاس تالانتتىڭ ءان ايتقان ۆيدەوسىن الەۋمەتتىك جەلى پايدالانۋشىلارى ءبىر- بىرىمەن ءبولىسىپ، 7-سىنىپ وقۋشىسىنا اق جول تىلەسۋدە.

«مەن ديماشقا ەلىكتەيمىن. ءبىراق ودان دا كۇشتى ءانشى بولعىم كەلەدى. 3-سىنىپتا وقىپ جۇرگەن كەزدە بايعانين اۋداندىق مۋزىكالىق مەكتەبىنىڭ دومبىرا سىنىبىنا وقۋعا ءتۇستىم. قازىر بىرنەشە كۇيدى تارتا الامىن، نوتا بىلەمىن. ال ۆيتاستىڭ «وپەرا 2» ءانىن ينتەرنەتتەن كورىپ، جاتتاپ الدىم. ءاندى ءجيى ايتىپ، داۋىسىمدى جاتتىقتىردىم. جوعارى دياپازوندا ايتىلاتىن اندەردى ۇناتامىن» ، - دەدى مۇحامبەتالي قالاۋوۆ.

مولىباي وتەۋماعامبەتوۆ پەن اقالتىن قايماقوۆانىڭ بەس بالاسى بار. بالالارىنىڭ ءبىرى قازا بولىپ، وتاعاسى مولىباي وتەۋماعامبەتوۆ تە كوز جۇمدى. وتباسىنىڭ كەنجەسى مۇحامبەتالي ول كەزدە 11 ايلىق بولعان. اكەسىن تەك سۋرەت ارقىلى تانيتىن بالا قازىر ۇلكەن ساحنانى باعىندىرۋدى ارمانداپ ءجۇر. الدىمەن مۋزىكالىق ءبىلىمىن جەتىلدىرۋدى ماقسات ەتكەن.

 «اكەم ءان ايتقان، انام دا ايتادى. ۇيدە اعام دا ءانشى. مەن ءىرى جوبالارعا قاتىسىپ، بايقاۋلاردا باق سىناعىم كەلەدى. بۇعان دەيىن وبلىستىق بايقاۋلارعا قاتىسقان ەمەسپىن. شاعىن ۆيدەو ينتەرنەتكە سالىنعان سوڭ اۋىلدا مەنى تانىپ، ۇلكەندەر سۋرەتكە ءتۇسىپ جاتىر. بۇل قىزىق ەكەن. مەن بولاشاقتا ءانشى، ءبيشى، كۇيشى بولعىم كەلەدى» ، - دەدى م. قالاۋوۆ.

قاراۋىلكەلدىدەگى باۋىرىن اقتوبە قالاسىنا الىپ كەلگەن ايگەرىم وتەۋماعامبەتوۆا ءىنىسىن مۋزىكالىق مەكتەپكە بەرۋدى ويلاپ وتىر. ول ءىنىسىنىڭ تويدا ەمەس، ساحنادا ءان ايتقانىن قالايدى.

 «اكەمىز مولىباي وتەۋماعامبەتوۆ تەاتر ءارتىسى بولعان. «اكە تاعدىرى» قويىلىمىندا وينادى. جەتىستىكتەرى مول ەدى. ءىنىم بەكتاس وتەۋماعامبەتوۆ تە ءان ايتىپ، 2012 -جىلى «جاس داۋرەن» بايقاۋىنان ەكىنشى ورىن الدى. انامىز مۇحامبەتاليدى 39 جاسىندا دۇنيەگە اكەلدى. كىشكەنتايىنان ەلگەزەك، ونەرگە جاقىن. بيلەيدى، كوڭىلدى تاپقىرلار كلۋبىنا قاتىسىپ، ەڭ ۇزدىك ويىنشى اتاندى. پوروديانى جاقسى سالادى. كاسىبي ءانشى بولۋى ءۇشىن ارنايى ءبىلىم الۋدى ءجون كورىپ وتىرمىز» ، - دەدى ايگەرىم وتەۋماعامبەتوۆا.

ايتا كەتەيىك، ونەرلى مۇحامبەتالي كۇرەس ۇيىرمەسىنە قاتىسىپ، جۇگىرەدى. №3 قاراۋىلكەلدى ورتا مەكتەبىندەگى مۇحامبەتاليدىڭ سىنىپ جەتەكشىسى قانات بۋلەكوۆ بولاشاعىنان مول ءۇمىت كۇتتىرەتىن كىشكەنتاي انشىگە دەمەۋشىلەر قولداۋ كورسەتىپ، كاسىبي ماماندار باعىتتاپ، ساباق بەرسە دەگەن ويىن جەتكىزدى.

 اۆتور: التىناي ساعىندىقوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى