جازباڭىز جاقسى وقىلۋى ءۇشىن
بۇل جازبامىز جۋرناليستيكا سالاسىنان جاڭا اۋىزدانىپ نە وسى ىسكە جاڭادان قىزمەتكە ورنالاسقان جاندارعا ارنالادى. كوركەم ءتىل. جازباڭىزدا جاقسى وي ايتىلعانىمەن، «سۋ تاتىپ تۇرسا»، ياعني تۇزسىز، دامدەۋىشسىز، سىلدىر ءسوز بولسا، وقىرماندار كەلەسىدە ءسىزدى وقىعىسى كەلمەيدى.
جازبا تاقىرىبى جۇتىنىپ، ءتىلى شۇرايلى بولعاندا عانا جوعارى باعالانادى. سوندىقتان بوس ۋاقىتىڭىزدا كىتاپتان اجىراماڭىز. جاي وقىپ قانا قويماي، ىشىندەگى تەڭەۋ، ەپيتەت سەكىلدى كوركەم سوزدەردى كوشىرىپ جازىپ الىپ، ءوڭىن وزگەرتىپ ءوز جازباڭىزعا قولدانساڭىز دا بولادى. ساۋاتتى جازبا. سويلەم قۇرىلىسى، ءسوز قولدانىسى جونىنەن قاتە جىبەرگىڭىز كەلمەسە، مەكتەپ وقۋلىقتارىنا كوز جۇگىرتىپ، ەسكەرمەگەن ەرەجەلەرىڭىزدى قايتالاپ شىقساڭىز بولادى.
ال وعان قاراعاندا تاعى ءبىر ءتيىمدى ءتاسىلى - كوركەم ادەبي ستيلدە جازىلعان كىتاپتاردى، پۋبليتسيستيكالىق ستيلدە جازىلعان گازەتتەردەگى ءماتىندى تولىعىمەن كوشىرىپ جازۋ. ءبىر قاراعاندا، ەرىككەننىڭ ەرمەگىندەي بوپ كورىنۋى مۇمكىن.
ءبىراق ۇزبەي، ۇنەمى كوشىرىپ وتىرساڭىز، ناتيجە بايقالادى. كومپيۋتەردە سوقىر تەرىم ءتاسىلىن مەڭگەرگەندە، پەرنەتاقتاعا قارامايمىز عوي. ارىپتەردى تەز ءارى دۇرىس تەرەمىز. ءبىراق پەرنەتاقتادا ي- دەن كەيىن قانداي ءارىپ دەسە، تس ەكەنىن، ا ءارپى ۆ مەن پ ءارپىنىڭ ورتاسىندا ەكەنىن جاتقا ايتا المايمىز. ول ساۋساقتارىمىزدا جاتتالىپ قالادى. سول سەكىلدى كوشىرىپ جازعاندا دا ءوزىڭىز ەلەمەگەن ەرەجەنى ساۋساقتارىڭىز جاتتاپ، سوزدەر مەن سويلەمدەردى قاتەسىز قۇرۋعا كوشىرۋ ءادىسى جاقسى كومەكتەسەدى.
ءوز ىسىنە ماحابباتپەن قارايتىن، جۇمىسىن جاقسى كورەتىن، جان- جۇرەگىمەن بەرىلىپ قىزمەت ەتەتىن ادام ۇنەمى وي ۇستىندە جۇرەدى. تابان استىنان تاقىرىپ تابۋعا تىرىسادى. جاقسى يدەيا ادام ساناسىنا تۇنگى مەزگىلدە نەمەسە كوشەدە جۇرگەندە، تابيعات اياسىندا ساپ ەتە تۇسەدى. وسىدان قالىس قالماي، ويدى ميدا ءپىسىرىپ، جىلدامىراق قاعازعا ءتۇسىرىڭىز. الدىمەن، مىندەتتى تۇردە تاقىرىبىن ءتۇرتىپ الىڭىز. ادامدارمەن سويلەسىپ وتىرعان كەزدە دە بىرەۋ كەنەت «بۇل نەگە ولاي؟» دەگەن سەكىلدى ساۋال تاستاسا، سول ءسىزدىڭ جازاتىن تاقىرىبىڭىز بولادى. ءبىر ادامعا قىزىقتى اقپارات، كەم دەگەندە باسقا ون ادامعا قىزىعۋشىلىق تۋعىزادى. قويىن داپتەرىڭىزگە نە تەلەفونىڭىزعا تاقىرىبىن جازىپ الساڭىز، اسىقپاي زەرتتەپ جازاسىز. ۋاقىتتى تىم سوزىپ جۇرۋگە دە بولمايدى.
بۇگىن ءسىزدىڭ ويلاعانىڭىزدى، ەرتەڭ وزگە جازىپ شىعارۋى ىقتيمال. سوندىقتان ويعا العان ءىسىڭىزدى مەزگىلىندە مەجەلەۋگە تىرىسىڭىز. تاقىرىپ تاڭدالعان سوڭ، وزگە تىلدەگى اقپاراتتارعا جۇگىنىڭىز. بىرنەشە سايتتان نە كىتاپتان سول تۋرالى اقپاراتقا قانىق بولعان سوڭ، ءوزىڭىز وي قورىتىپ جازىڭىز. ورىس ماتەريالىن تۋرا سولاي اۋدارىپ جازىپ، "دايىن اسقا تىك قاسىق" بولماعايسىز. كەم دەگەندە 3-4 سايتتى اشىپ، مالىمەتتەرمەن تانىسىڭىز. ولار كوبىنەسە ابزاتس باسىنداعى سويلەمدى، نەگىزگىسىن قارامەن بەلگىلەپ قويادى. كەيدە وسىنى عانا وقىپ الساڭىز جەتكىلىكتى. تاقىرىپ تۋرالى نەگىزگى قور جيناقتالعان سوڭ، ورىس ماتىندەرىنىڭ تار اياسىنان كەڭ كوكجيەككە شىعىپ، ءوز كوزقاراسىڭىزبەن كوسىلە جازىڭىز. سوندا دىلىمىزگە (مەنتاليتەت) ساي، شىنايى جازبا تۋادى. ەڭ باستىسى، وقىرمان الدىنداعى زور جاۋاپكەرشىلىكتى سەزىنىپ، ماقالا سوڭىندا ءوز اتى- ءجونىڭىز جازىلىپ تۇرعانىنا ۇيالمايتىنداي جازبا جاريالاڭىز.
Massaget.kz
