ۇ ب ت- دان قۇلاعان تۇلەكتەر تەگىن وقىپ، شاكىرتاقى الاتىن بولدى
بۇل تۋرالى و ك ق بريفينگى بارىسىندا ق ر ەڭبەك جانە حالىقتى الەۋمەتتىك قورعاۋ ۆيتسە- ءمينيسترى ءبىرجان نۇرىمبەتوۆ ايتتى.
«ەگەر سوڭعى جىلداردى ساراپتاپ قارايتىن بولساق، جىل سايىن ۇلتتىق بىرىڭعاي تەستىلەۋدەن وتە الماي، وقۋعا تۇسپەي قالعان مەكتەپ تۇلەكتەرىنىڭ سانى ورتا ەسەپپەن 20 مىڭدى قۇرايدى. سوندىقتان بيىلعى جىلى وسى بالالاردى تەحنيكالىق كاسىپتىك ءبىلىم بەرۋ ورىندارىنا مەملەكەتتىڭ ەسەبىنەن تەگىن وقۋعا جولدايمىز»، - دەدى نۇرىمبەتوۆ.
ۆيتسە- مينيستردىڭ ايتۋىنشا، قازىرگى تاڭدا 361 تەحنيكالىق كاسىپتىك ءبىلىم بەرۋ ورىندارى ولاردى قابىلداۋعا دايىن. ءبىرىنشى قىركۇيەكتەن باستاپ بالالاردىڭ بارلىعى وقۋعا بارادى، قازىر ولاردىڭ ءتىزىمى دايارلانىپ جاتىر.
«وقۋىن باعدارلاما (ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ باعدارلاماسى - اگەنت. ) ەسەبىنەن تولەيمىز، شاكىرتاقىسى تولەنەدى. سونداي-اق، ءبىر مەزگىلدىك ىستىق تاماقپەن قامتىلادى»، - دەدى ۆيتسە- مينيستر.
ونىڭ ايتۋىنشا، ءبىلىمى جوق جۇمىسسىز جۇرگەن ەرەسەك ازاماتتار 1-6 ايلىق قىسقا مەرزىمدى كۋرستارعا تارتىلادى. 1 -شىلدەدەگى جاعداي بويىنشا، 21 مىڭ 127 ادام قىسقا مەرزىمدىك كۋرستارعا تارتىلدى، بىتىرگەندەردى جۇمىسپەن قامتۋ جاعى دا قاراستىرىلعان.
«ادامنىڭ جۇمىسقا ورنالاسۋىنا باستى كەدەرگى - بىلىمنىڭ بولماۋى. رەسمي كورسەتكىشكە كەلسەك، ەلىمىزدە 9 ميلليونعا جۋىق ەڭبەككە قابىلەتتى, ەكونوميكالىق بەلسەندى ادام بار. سونىڭ 27-28 پايىزى، وكىنىشكە وراي مەكتەپتەگى ورتا بىلىممەن شەكتەلگەن. ال ءوز بەتىنشە جۇمىسپەن قامتىلعانداردىڭ جارتىسى، جۇمىسسىزداردىڭ 25 پايىزى مەكتەپتەگى ورتا بىلىممەن قالعان. سوندىقتان، حالىقتى جاپپاي وقىتۋدى ماقسات ەتىپ وتىرمىز»، - دەيدى نۇرىمبەتوۆ.
ۆيتسە- مينيستردىڭ ايتۋىنشا، بۇرىنعى جىلدارى «جول كارتاسى» بويىنشا جىلىنا 6-7 مىڭ ادام وقىتىلسا، جاڭا باعدارلاما (ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ باعدارلاماسى - اگەنت. ) بويىنشا بيىلعى جىلدىڭ وزىندە بارلىعى 90-100 مىڭ ادامدى (تۇلەكتەر مەن ەرەسەكتەر - اگەنت. ) وقىتۋ كوزدەلىپ وتىر.
ايتا كەتەيىك، ءبىز بۇعان دەيىن بيىلعى وقۋ جىلىنان باستاپ جاستار كوللەدجگە ەمتيحانسىز قابىلداناتىنى جايلى حابارلاعان ەدىك.
