استانا ازيانىڭ ەڭ كەرەمەت جەرلەرىنىڭ العاشقى وندىعىنا ەندى
باسىلىم ساراپشىلارى «شەكسىز جازىق دالانىڭ جۇرەگىندە ورنالاسقان اينەك پەن بولاتتان جاسالعان ساعىم» استانانى رەيتينگتىڭ 5-ورنىنا ورنالاستىردى. Lonelyplanet.com « استانا ءوزىنىڭ كوك تىرەگەن ءزاۋلىم ۇيلەرى، ۇلكەن الاڭدارى جانە بۇلىڭعىر اينەكتى پيراميداسى مەن مەملەكەت باسشىسى نۇرسۇلتان ءابىش ۇلى نازاربايەۆتىڭ فۋتۋريستىك قيالىنىڭ ءبىر بولشەگىنە اينالدى» دەپ جازدى.
باسىلىم بيىلعى جازدا استانادا تۇراقتى جانە جاڭعىرتىلاتىن ەنەرگيا كوزىنە ارنالعان ەكسپو-2017 كورمەسى ءوتىپ جاتقاندىعىن ەسكە سالا كەتتى. تۋريستەردىڭ ەشبىر كەدەرگىسىز كورمەگە كەلۋى ءۇشىن قازاقستان 45 مەملەكەتپەن ۆيزاسىز كەلى رەجيمىن ىسكە قوستى، ولاردىڭ قاتارىندا ە و ەلدەرى، ا ق ش، كانادا جانە اۆستراليا بار.
رەيتينگ باسىندا قىتايدىڭ ورتالىق بولىگىنىڭ سولتۇستىگىندە ورنالاسقان گانسۋ پروۆينسياسى تۇرعاندىعىن ايتىپ وتكەن ءجون. ەكىنشى ورىندى ەكى جاپون قالاسى بولىسكەن، ءىرى پورتتى قالا يوكوگاما جانە ەلدەگى ەڭ كونە قالالاردىڭ ءبىرى كاماكۋرا. ەگەر تۋريستەر جىلىنىپ العىلارى كەلسە، ولار رەيتينگتىڭ ءۇشىنشى باعانىندا ورنالاسقان ءۇندىستاننىڭ كەرالا شتاتىنداعى كۇنگەيلى جاعاجايلارعا بارۋىنا بولادى.
استانادان ءسال عانا ىلگەرى ءتورتىنشى ورىنعا تاماق تالعاعىشتاردىڭ جۇماعىنا اينالعان سينگاپۋردىڭ كەونگ سايك روۋد كۆارتالى ورنالاسقان. Lonely Planet ۇسىنعان ازيانىڭ ەڭ كەرەمەت جەرلەرىنىڭ وندىعىنا تاكاياما (جاپونيا)، شيان (قىتاي)، كاندي (شري- لانكا)، مالاككا (مالايزيا) جانە رادجا- امپات (يندونەزيا) ەنگەن.
Lonely Planet باسىلىمى 1972 -جىلى اۆستراليادا قۇرىلعان. ونى 2007 -جىلى BBC- دىڭ كوممەرتسيالىق اگەنتتى - BBC Worldwide ساتىپ الدى.
