قىتايدا «ايداعى ءومىر» تاجىريبەسىنىڭ العاشقى ەكى ايى ءساتتى اياقتالدى
ونىڭ اۋماعى - 160 شارشى مەتر. مۇندا جاتاتىن جانە دەمالاتىن ورىن مەن قالدىقتاردى جويۋعا ارنالعان بولمە بار. دەگەنمەن مودۋلدىڭ كوپ بولىگىن ەكى جىلىجاي الىپ جاتىر. ەرىكتىلەر وندا كوكونىس ءوسىرىپ، سونىمەن تاماقتانادى.
جالپى قىتاي 2036 -جىلعا تامان ايعا العاشقى عارىشكەرلەرىن اتتاندىرۋعا نيەتتى. بۇل جوبا كومەگىمەن استروناۆتتاردىڭ ۇزاق ۋاقىت بويى اۆتونومدى مودۋلدىڭ ىشىندە ءومىر ءسۇرۋ قابىلەتتىگى تەكسەرىلەدى. وسى ماقساتپەن اسپاناستى ەلىنىڭ عالىمدارى ءۇش جىل بۇرىن ۇقساس تاجىريبە جۇرگىزگەن بولاتىن. ول نەبارى ءۇش ايعا عانا سوزىلعان.
ليۋ حوي، تاجىريبە قاتىسۋشىسى:
- كۇنى بويى شارۋالارمەن اينالىسىپ ءجۇرىپ، ۋاقىتتىڭ قالاي وتكەنىن بايقاماي قالامىز. الايدا دەمالۋعا وتىرعاندا كوڭىلىمىز جابىرقاپ قالادى. ويتكەنى جاقىندارىڭ جايلى ويلاپ، تۋعان- تۋىستارىڭدى ساعىناسىڭ. سوندىقتان جوبا قاتىسۋشىلارىمەن اڭگىمە- دۇكەن قۇرىپ، ءبىراز جەڭىلدەپ قالامىز.
www.24.kz
