قىتاي ەلى قازاقستانداعى تۇيە شۋداسىنا قىزىعۋشىلىق تانىتىپ وتىر

وندا وتاندىق كاسىپكەرلەر بالىق، ۇن، ماكارون سياقتى وزگە دە تاۋارلارىن ۇسىندى. بۇل كۇندەرى قىتاي استاناسىنداعى ۇلكەن سۋپەرماركەتتىڭ ءبىرىنشى قاباتى قازاقستاندا شىعارىلعان ونىمدەرگە تولىپ تۇر. ازىرگە جاپپاي ساۋدالانىپ جاتقان جوق. الايدا كاسىپكەرلەر كەلەشەكتە جاپپاي قىتاي نارىعىن جاۋلاۋعا ءۇمىتتى.

 بەيجىڭدەگى ساۋدا ورىندارىندا وتاندىق ونىمدەردى ساۋدالاۋ ءۇشىن ۇنەمى جارناما جاساۋ قاجەت. جارمەڭكەنىڭ دە كوزدەگەنى سول - قوسپاسى جوق، قۇنارلى تاعامداردى قىتايلىقتارعا كەڭىنەن تانىستىرۋ. ءتىپتى كەسپە، ماكارون، بالمۇزداقتىڭ ءدامىن تاتىپ كورۋگە بولادى.

 ليۋ چيۆەي، بەيجىڭ قالاسىنىڭ تۇرعىنى:

- قازاقستاندىق ماكاروننىڭ ءدامى تاڭدايىمنان كەتەر ەمەس. وزگە ەلدىڭ ونىمدەرىمەن سالىستىرعاندا شىنىمەن وزگەشە ەكەن. باعاسى دا ءتيىمدى.

 قازاقستاندا شىعارىلعان قۇنارلى تاعامدار عانا ەمەس، تابيعي تازا جۇنگە دە قىزىعىپ جۇرگەن قىتايلاردىڭ قاراسى كوپ. اتىراۋدان قىتاي استاناسىنا دەيىن 8500 شاقىرىمدى ەڭسەرىپ كەلگەن كاسىپكەر نازگۇل ەسماقانوۆانىڭ دا ەڭبەگى اقتالعانداي. تۇيە مەن قوي جۇنىنەن جاسالعان جامىلعى بەيجىڭدىكتەردى بىردەن باۋراپ الدى. 2015 -جىلى جەلتوقساندا ەلباسىنىڭ ءوزى تەلەكوپىر ارقىلى اشقان كاسىپورىن قازىر ءتۇرلى ءونىم شىعارادى. تۇيە شارۋاشىلىعى بولعانداقتان شيكىزات كوپ. ونى وزدەرى تەرەڭ وڭدەپ وتىر.

 نازگۇل ەسماقانوۆا، كاسىپكەر:

- قازاقستان جۇنىنە سۇرانىس وتە كوپ. نەگە دەسەڭىز، بىزدەگى قويدىڭ دا، تۇيەنىڭ دە ءجۇنى ساپالى. تۇيەنىڭ ءجۇنىن عانا ەمەس، شۋداسىن دا باسقا بۇيىمدار جاساۋعا پايدالانادى. قازىر سول شۋدانى قىتايلار پاريك جاساۋعا ساتىپ الايىن دەپ جاتىر. ءبىز سول شارت جاساۋعا جۇمىس ىستەپ جاتىرمىز.

 بۇل جولى قىتاي استاناسىنا 18 قازاقستاندىق ءونىم ءوندىرۋشى كەلدى. ولاردىڭ تاۋارى ساپا، كارانتين جانە ينسپەكتسيانى قاداعالاۋ باسقارماسىنىڭ تەكسەرۋىنەن ءوتىپ، ارنايى رۇقساتىن العان. قازاقستاندا جاسالعان تاۋاردى تاماشالاۋعا بەيجىڭ عانا ەمەس شاندۇڭ، حۋنان، حىبىي پروۆينتسياسىنان 100-گە جۋىق قىتاي كومپانياسى مەن ساۋدا ورىندارى كەلدى.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى