سولتۇستىككە كوشەتىندەردى ىنتالاندىرۋ تەتىكتەرى جاريالاندى
«ءبىزدىڭ تاراپىمىزدان ءتۇرلى زەرتتەۋلەر جۇرگىزىلدى، ەگەر قازىرگى دەموگرافيالىق، كوشى- قوندىق ۇردىستەر ساقتالار بولسا، الداعى بەس جىلدا شىعىس قازاقستان، پاۆلودار، سولتۇستىك قازاقستان جانە قوستاناي وبلىستارىندا 167 مىڭنان استام ەڭبەككە قابىلەتتى ازاماتتاردى جوعالتامىز. ال جامبىل، و ق و، الماتى، ماڭعىستاۋ جانە قىزىلوردا وبلىستارىندا ەڭبەك رەسۋرسى كوپ، حالىقتىڭ سانى كوبەيىپ جاتىر. سوندىقتان، بوس ورىنداردى وڭتۇستىكتىڭ ەسەبىنەن تولتىرۋ ءۇشىن 2018-2022 -جىلدارى 59 مىڭ جانۇيانى سولتۇستىككە كوشىرۋدى كوزدەپ وتىرمىز»، - دەدى ۆيتسە- مينيستر.
ب. نۇرىمبەتوۆتىڭ ايتۋىنشا، جىل باسىنان بەرى جۇمىس بابىمەن وڭىردەن- وڭىرگە كوشۋ باعدارلاماسى اياسىندا 114 وتباسى، ياعني 461 ادام وڭتۇستىكتەن سولتۇستىككە كوشىپ، جۇمىسپەن قامتىلدى جانە تاعى 1200 وتباسى كوشۋگە دايىن. بۇل ەرىكتى كوشى- قون باعدارلاماسى بولعاندىقتان، ب. نۇرىمبەتوۆ ازاماتتارعا وڭتۇستىكتەن سولتۇستىككە كوشۋ ءۇشىن ءبىرقاتار ىنتالاندىرۋ تەتىكتەرىن ازىرلەنىپ جاتقانىن اتاپ ءوتتى.
«ەگەر وڭتۇستىكتىڭ ازاماتى سولتۇستىككە جۇمىس بابىمەن كوشكىسى كەلسە، كوشى- قون شىعىندارىن وتەۋ ءۇشىن ءار وتباسى مۇشەسىنە 35 ا ە ك كولەمىندە 79415 تەڭگەدەن تولەپ بەرەمىز. ەكىنشىدەن، بارعان جەرىندە تۇرعىن ءۇي ماسەلەسىن شەشۋ ءۇشىن، ءبىر جىلعا دەيىن پاتەر/ءۇي جالدايتىن بولسا، جالعا الاتىن اقشانى ايىنا 34 مىڭنان 68 مىڭعا دەيىن ءبىر جىل بويى تولەپ بەرۋگە دايىنبىز. ەگەر اي سايىن تولەنەتىن قاراجاتتىڭ ەسەبىنەن اۋىلدى جەردەن شاعىن ءۇي ساتىپ الۋ مۇمكىندىگى بولسا، ءبىر جىلدىق پاتەراقىنى ءبىر مەزگىلدە تولەپ بەرۋ جولدارىن قاراستىرىپ جاتىرمىز. «تۇرعىن ءۇي قۇرىلىس بانكىمەن» بىرلەسىپ، باعدارلاما اياسىندا كوشەتىن ازاماتتارعا جەڭىلدەتىلگەن زايەم، سۋبسيديالار بەرۋ تەتىكتەرىن قاراپ جاتىرمىز»، - دەدى ول.
سونىمەن بىرگە، سولتۇستىك ءوڭىردىڭ اۋىلدى ەلدىمەكەندەرىنە كوشىپ بارعان وڭتۇستىك ازاماتتارىنا جەر تەلىمدەرى كەزەكسىز بەرىلۋى مۇمكىن.
«وزدەرىڭىزگە بەلگىلى، قازىرگى ۋاقىتتا جەر كونكۋرس ارقىلى بەرىلەدى. ال ءبىزدىڭ باعدارلاما قاتىسۋشىلارىنا اۋىل شارۋاشىلىق جەرلەرىن، كوممەرتسيالىق تۇرعىدا پايدالانىلاتىن نەمەسە بالاباقشامەن اينالىساتىن جەرلەردى كونكۋرسسىز بەرۋ جولدارى شەشىلىپ جاتىر. ول ءۇشىن ءتيىستى زاڭدارعا وزگەرىستەر ەنگىزۋ قاجەت»، - دەدى ول.
تاعى ءبىر ايتا كەتەرلىگى، وڭتۇستىكتەن سولتۇستىككە كوشكەن ازاماتتاردىڭ بيزنەس- يدەياسى بولسا، ولار «بيزنەس- باستاۋ» جوباسى ارقىلى وقىتىلادى. ەگەر «اتامەكەن» كاسىپكەرلەر پالاتاسى جاس كاسىپكەر تۋرالى وڭ پىكىر بىلدىرسە، وعان 5 ميلليون تەڭگەگە دەيىن قايتارىمسىز گرانت بەرۋ مۇمكىندىكتەرى قاراستىرىلۋدا.
اۆتور: ايجان سەرىكجان قىزى
