جاھاندىق جىلىنۋعا نەگىزگى كىنالى كومپانيالار اتالدى

پارنيكتىك گازداردى شىعارۋدىڭ جاھاندىق بازاسىن جۇرگىزەتىن Carbon Disclosure Project ۇيىمىنىڭ جاڭا ەسەبىنىڭ دەرەكتەرىنە سايكەس، 1988 -جىلدان بەرى الەم بويىنشا اۋاعا تارالىپ جاتقان پارنيكتىك گازداردىڭ% 70 ى 100 كومپانياعا تيەسىلى كورىنەدى.

1988 -جىلدان بەرى اتموسفەراعا زياندى قالدىقتاردى شىعارۋدا «كوشباسشى» بولعان ExxonMobil, Shell, BP جانە Chevron كومپانياسى ەكەن. ەگەر قازبا وتىندارىن ءوندىرۋ وسىلاي 28 جىل بويى، ياعني 1988 -جىلدان 2017 -جىلعا دەيىنگى ۋاقىتتاعىداي جالعاسا بەرسە، وندا عاسىردىڭ سوڭىنا قاراي پلانەتامىزدىڭ ورتاشا تەمپەراتۋراسى ءتورت گرادۋسقا دەيىن كوتەرىلمەكشى.

مۇنداي جىلىنۋ ازىق- تۇلىك تاپشىلىعىنا جانە وسىمدىك پەن جانۋارلاردىڭ كوپتەگەن ءتۇرىنىڭ جويىلىپ كەتۋىنە اكەلەدى دەسەدى.

بۇنىڭ الدىن الۋ ءۇشىن ءىرى كومپانيالار پارنيكتى گازدىڭ مولشەرىن ازايتۋ بويىنشا شارا قولدانۋى ءتيىس بولعانىمەن، ولار تابىستان قاعىلاتىندىقتان، بۇعان كەلىسپەي وتىر.

ساراپشىلاردىڭ زەردەلەۋىنە قاراعاندا، قازبا وتىندارىمەن اينالىساتىن كومپانيالار جاڭارتىلعان ەنەرگيا كوزدەرىمەن سالىستىرعاندا باسەكەگە قابىلەتسىز بولاتىندىقتان، مۇناي، كومىر جانە گاز جوبالارىنا بولاشاقتا ەكى تريلليون دوللار شىعىنداۋى مۇمكىن.

امەريكالىق Sierra Club ەكولوگيالىق ۇيىمىنىڭ اتقارۋشى ديرەكتورى مايكل براۋننىڭ پىكىرىنشە، ينۆەستورلار جاقىن ارادا قازبا وتىنداردان باس تارتۋى ءتيىس.

«بۇل ەكولوگيالىق، مورالدىق جانە ەكونوميكالىق تۇرعىدان وتە قاۋىپتى. الەم جەدەل قارقىنمەن جاڭارتىلعان ەنەرگيا كوزدەرىنە اۋىسادى» ، - دەيدى ول.

الايدا وسى ماسەلەگە قاتىستى جاعىمدى جاڭالىق تا بار: RE100 باستاماسىنىڭ اياسىندا شامامەن 100 كومپانيا، ونىڭ ىشىندە Apple, Facebook, Google جانە Ikea تولىعىمەن جاڭارتىلعان ەنەرگيا كوزدەرىنە كوشپەك.

جاقىندا Volvo كومپانياسى 2019 -جىلى شىعاتىن اۆتوكولىكتەرىنىڭ بارلىعى گيبريدتى نەمەسە ەلەكترلى بولاتىنىن مالىمدەدى.

ساراپشىلار تاياۋ 10 جىلدا قازبا وتىندارىن وندىرەتىن كومپانيالار جويىلادى دەپ بولجاپ وتىر.

Baq.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى