اقتوبەدەگى جول-كولىك وقيعاسى پوليتسيانىڭ شالا جۇمىس ىستەپ وتىرعانىن كورسەتەدى - قالا اكىمى

بۇگىن قالا اكىمى ءىلياس يسپانوۆ بۇل وقيعاعا جول-پاترۋلدىك پوليتسيا قىزمەتىنىڭ دە جاۋاپتى ەكەنىن ايتتى، دەپ حابارلايدى قازاقپارات ءتىلشىسى.

اقتوبەنىڭ اكىمى ءىلياس يسپانوۆ جەرگىلىكتى پوليتسيا قىزمەتىنە ءتارتىپتى كۇشەيتۋدى تاپسىردى. قالالىق ءماسليحات دەپۋتاتتارىنىڭ الدىندا «جول-پاترۋلدىك پوليتسيا قىزمەتىندە جەمقورلىق بار» دەگەن اكىم تۇڭعىش پرەزيدەنت اتىنداعى ورتالىق ساياباقتا بولعان جول-كولىك وقيعاسىنا پوليتسياسىنىڭ دا جاۋاپتى ەكەنىن ايتتى.

«ءبىر جىلعا جۋىق ۋاقىت جۇمىس ىستەسەم دە ءتارتىپتى رەتكە كەلتىرە الماي وتىرمىز. كىم، قاي جەرگە جاۋاپتى ەكەنىن بىلمەي كەلەمىز. تەرريتوريا بولىنگەن. ۋچاسكەلىك پوليتسيا قىزمەتكەرى ادامدارمەن بىرگە بولۋى كەرەك. باستى پروبلەما - جاۋاپكەرشىلىك جوق، ادامدار جازالانبايدى. جول- پاترۋلدىك پوليتسياسىندا دا كەمشىلىك بار. ول جەردە جەمقورلىق، باسقا دا قۇقىق بۇزۋشىلىق بار. سوڭعى وقيعا جول- پاترۋلدىك پوليتسياسى قىزمەتكەرلەرى جۇمىسىنىڭ شالا ەكەنىن كورسەتتى. ايىپپۇل سالۋ، ايىپپۇل ءوندىرۋدى دە تۇبىرىمەن وزگەرتۋ كەرەك»، - دەدى قالا اكىمى ءىلياس يسپانوۆ.

ايتا كەتەيىك، اقتوبەدەگى جول-كولىك وقيعاسىنان سوڭ بويجەتكەن قازا بولىپ، ءبىر ادام اۋرۋحاناعا تۇسكەن بولاتىن. قازىرگى ۋاقىتتا زارداپ شەككەن جىگىتتىڭ اياعىنا وتا جاسالدى. جاعدايى ورتاشا اۋىر. «19 جاستاعى ناۋقاستىڭ وڭ جاق تىزەسىنە وتا جاسالدى. جاعدايى ورتاشا اۋىر. ال كولىك جۇرگىزۋشىسىنە پسيحولوگتىڭ كومەگى كەرەك بولدى. ول بۇگىن ءوزىنىڭ شاشى ءتۇسىپ جاتقانىن ايتتى. قاتتى كۇيزەلىسكە تۇسكەن ادامدا مۇنداي جاعداي بولادى»، - دەدى وبلىستىق جەدەل جاردەم اۋرۋحاناسىنىڭ باس دارىگەرى راحىمجان ارىستان.

اۆتور: التىناي ساعىندىقوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى