الماتى زووباعى جانۋارلاردى كەلۋشىلەردەن قورعاۋعا كىرىستى
مەكەمەنىڭ باسپا ءسوز قىزمەتى حابارلاعانداي، كەلۋشىلەردىڭ ىشىندە جانۋارلارعا زيان كەلتىرەتىندەرى دە كەزدەسەدى.
«وتكەندە ءبىر ەر ادام گيمالاي ايۋىنا تاس لاقتىرعان. وسىلاي ول ايۋدىڭ نازارىن اۋدارۋعا تىرىسقان. جانۋارلارعا جەۋگە بولايتىن ونىمدەر بەرەتىندەر بار. كەلۋشىلەردىڭ ۇلكەن دە، كىشىسى دە ولارعا پوپكورن، جۇگەرى، چيپسى، كامپيت، الما بەرۋگە قۇمار. ولار كەتكەن سوڭ قىزمەتكەرلەر توردىڭ ىشىنەن ءتۇرلى قوقىس شىعارادى»، - دەدى باسپا ءسوز قىزمەتىنەن.
مامانداردىڭ ايتۋىنشا، وسىنداي كەلۋشىلەردىڭ ارەكەتىنەن قورعاۋ ءۇشىن ەندى قوڭىر ايۋلاردىڭ ۆولەرى اينەك جابىندىمەن قورشالاتىن بولادى.
«قۇرىلىس جۇمىستارى بۇگىن- ەرتەڭ باستالعالى وتىر. ماتەريالدار تۇگەل اكەلىندى. سونىمەن قاتار، امۋر جولبارىستارىنا دا جاڭا جاي سالىنادى. وسىنداي جۇمىستاردىڭ ارقاسىندا جانۋارلاردىڭ قاۋىپسىزدىگىن ارتتىرا تۇسەمىز»، - دەدى باسپا ءسوز قىزمەتىنەن.
زووباق ماماندارىنىڭ ايتۋىنشا، كەلۋشىلەردىڭ كوپ بولۋىنا بايلانىستى ولاردىڭ ءبارىن تەكسەرۋ مۇمكىن ەمەس. الايدا، ماس كۇيىندە كەلگەن ادامدار كىرگىزىلمەيدى.
ايتا كەتۋ كەرەك، زووباق ديرەكتورى ەرجان ەركىنبايەۆ ينستاگرامدا جاسى ۇلكەن ەر ادامنىڭ قارا ايۋعا تاس لاقتىرعانىن جازعان بولاتىن. جازبا عالامتور قولدانۋشىلارى اراسىندا ۇلكەن نارازىلىق تۋدىردى. پىكىر بىلدىرۋشىلەردىڭ ءبىرى «ۇلكەن كىسىنى ۆولەرگە ايۋمەن بىرگە قاماپ قويۋ كەرەك» دەسە، كەيبىرەۋلەر ايىپپۇل سالۋدى ۇسىندى. ال زووباق باسشىلىعى ول كىسىنى جازالاۋعا قاتىستى ەشقانداي پىكىر بىلدىرمەدى. وسىعان ۇقساس جاعداي 2015 -جىلى بولعان ەدى. ەكى بوزبالا پنيەۆماتيكالىق قارۋدان ۇيرەكتەردى اتىپ جاتقان جەرىنەن ۇستالدى. سونداي- اق، وسىدان بىرنەشە جىل بۇرىن ولگەن قولتىراۋىننىڭ ىشىنەن ۆەتەرينارلار پلاستيك قۇتىلار، كامپيت، قاعاز تاۋىپ العان. «ونىڭ ولىمىنە وسى سەبەپ بولۋى دا عاجاپ ەمەس»، دەيدى ماماندار.
اۆتور: گۇلميرا عوسمانالي
