مينيستر: قازاقستان مۇناي ءوندىرۋ كولەمىن بۇدان ارى ازايتا المايدى
ستامبۋلدا ءوتىپ جاتقان دۇنيەجۇزىلىك مۇناي كونگرەسىندە جۋرناليستەر سۇراعىنا جاۋاپ بەرگەن بوزىمبايەۆ و پ ە ك- پەن جاسالعان كەلىسىمنەن ءوندىرىس كولەمىن ارتتىرۋ ارقىلى ءبىر- ەكى ايدا شىعۋدى قولدايتىنىن ايتتى.
بوزىمبايەۆتىڭ سوزىنشە، قازاقستان جالپى العاندا و پ ە ك- پەن جاسالعان مۇناي ءوندىرۋ كولەمىن ازايتۋ تۋرالى كەلىسىمدى ورىنداپ وتىر جانە قازاقستان ءۇشىن بۇدان ارى ءوندىرىس كولەمىن ازايتۋ قيىن. مينيستر رەسمي استانا كەلىسىمدى ۇزارتۋ قاجەتتىگىنە قاتىستى ۇستانىمىن ايقىنداماعانىن ءبىلدىرىپ، بۇل ماسەلەنىڭ قاراشادا وتەتىن و پە ك- ءتىڭ كەزەكتى سامميتىندە قارالاتىنىن ايتتى.
قانات بوزىمبايەۆ قازاقستان بيىل جىلدىق جوسپاردى اسىرا ورىنداپ، 81 ميلليون توننادان استام مۇناي وندىرەتىنىن جەتكىزدى. ونىڭ ايتۋىنشا، قازاقستان بيىل 81 ميلليون توننا مۇناي ءوندىرۋدى جوسپارلاعان.
25 - مامىردا ۆەنادا وپەك ەلدەرى مەن وعان كىرمەيتىن مۇناي ءوندىرۋشى باسقا دا ەلدەر بۇعان دەيىنگى مۇناي ءوندىرۋ كولەمىن ازايتۋ كەلىسىمىنىڭ مەرزىمىن توعىز ايعا - 2018 -جىلدىڭ ناۋرىزىنا دەيىن ۇزارتۋعا كەلىسكەن. كەلىسىمگە قول قويعان ەلدەر تاۋلىگىنە وندىرىلەتىن جالپى مۇناي كولەمىن 1,8 ميلليون باررەلگە ازايتتى.
استانا مامىردىڭ سوڭىندا و پ ە ك ەلدەرى مەن ونىڭ قۇرامىنا كىرمەيتىن مەملەكەتتەردىڭ ءوندىرىس كولەمىن ازايتۋ مەرزىمىن ۇزارتۋ تۋرالى كەلىسىمىن قولداعان ەدى.
مينيسترلىك قازاقستان وسى كەلىسىم بويىنشا ءوزىنىڭ كۇندىك ءوندىرىس كولەمىن 20 مىڭ باررەلگە ازايتۋ تۋرالى مىندەتتەمەسىن ورىنداي بەرۋگە نيەتتى ەكەنىن مالىمدەگەن.
قازىر مۇناي باررەلى 50 دوللاردان ساۋدالانىپ جاتىر. بۇل باعا 2016 -جىلدىڭ باسىنداعى 30 دوللارمەن سالىستىرعاندا الدەقايدا جوعارى، دەگەنمەن 2014 -جىلعى باعادان ەكى ەسەگە تومەن.
azattyq.org
