استانا كۇنىنە وراي الماتىدا جاڭا جول ايرىعى پايدالانۋعا بەرىلدى
جاڭا جول ايرىعى دوروجنيك، شاڭىراق، وجەت ىقشاماۋداندارىنداعى كولىك تىعىزدىعىن 20 پايىزعا قىسقارتادى، دەپ حابارلادى قالا اكىمدىگى.
جوبانىڭ تەحنولوگيالىق جاعىنان كۇردەلى بولۋىنا قاراماستان، نىسان جوسپارلانعان مەرزىمىنەن التى اي بۇرىن بەرىلدى. جول ايرىعىنىڭ قۇرىلىسى 2015 -جىلدىڭ سوڭىندا باستالعان ەدى، ونىڭ جالپى قۇنى - 8,6 ميلليارد تەڭگە. الماتى اكىمى باۋىرجان بايبەك 10 جىل ىشىندە قالادا 30 جول ايرىعىنىڭ ىسكە قوسىلعانىن ايتادى.
ەستەرىڭىزگە سالا كەتەيىك، قازىرگى كەزدە فۋرمانوۆ كوشەسى جانسۇگىروۆ كوشەسىنە دەيىن تەمىرجول ارقىلى ەستاكادامەن بىرگە، حمەلنيتسكي كوشەسى ءسۇيىنباي داڭعىلىنان جاس قانات ىقشاماۋدانىنا دەيىن، اباي داڭعىلى اۋەزوۆ كوشەسىنەن قالقامانعا دەيىن، ودان قالا شەكاراسىنا دەيىن ۇڭگىلەنۋدە.
سەيفۋللين - جانسۇگىروۆ، رىسقۇلوۆ داڭعىلى، ەمتسوۆ كوشەسى مەن قۇلجا تراسساسى قيىلىستارىندا جول ايرىعى قۇرىلىستارى ودان ءارى جالعاسۋدا، BRT جەلىسى بويىنشا كوشە- جول جۇيەسى جاڭارۋدا، ناۋرىزباي اۋدانىنداعى قالقامان جانە التى الاش ەلدى مەكەندەرىندە ۇزىندىعى 17,335 ك م بولاتىن، الاتاۋ اۋدانىنداعى العاباس جانە اقبۇلاق ەلدى مەكەندەرىندە ۇزىندىعى 10,993 ك م بولاتىن جولدار سالىنۋدا. سونىمەن قاتار الماتىدا جۇرگىنشىلەرگە باسىمدىق بەرۋ ءۇشىن ءبىرقاتار كوشە قايتا جاسالۋدا.
بيىلعى جىلدىڭ اياعىنا دەيىن پانفيلوۆ، جىبەك جولى، گوگول، قابانباي باتىر كوشەلەرى مەن «استانا» الاڭىنا تاستار توسەلەدى، جاسىل جەلەك وتىرعىزىلادى، كىشى ارحيتەكتۋرالىق فورمالار قويىلادى، سپورت ينۆەنتارلارى ورناتىلىپ، بالالار الاڭدارى پايدا بولادى، ۆەلوجولدار اباتتاندىرىلادى، نىساندار تەكشەلەرى جارىقتاندىرىلادى. وسىعان قاتىستى جاسالعان جوبالاردىڭ ەشقايسىسىندا جاسىل جەلەكتى بۇزۋ، بۇرىننان بارىن كەسۋ قاراستىرىلماعان. كولەڭكەلى كەڭىستىكتى كەڭەيتۋ ءۇشىن بيىك بولىپ وسەتىن قايىڭ، ەمەن، تەرەك جانە باسقا دا اعاش تۇرلەرى، مىڭنان استام بۇتا- شىلىك وتىرعىزىلاتىن بولادى.
اقپارات كوزى: strategy2050.kz
