قىرعىز پرەزيدەنتى ەلباسىن تۋعان كۇنىمەن قۇتتىقتادى
«باۋىرلاس قازاقستاننىڭ تابىستارى، الەۋمەتتىك- ەكونوميكالىق جەتىستىكتەرى، الەمدىك دەڭگەيدەگى جوبالاردى جۇزەگە اسىرۋى مەن حالىقارالىق ارەناداعى ابىرويىنىڭ ارتۋى ءسىزدىڭ كورەگەندى ساياساتىڭىزدىڭ ارقاسى. ءسىزدىڭ باي ءارى كاسىبي ءومىر جولىڭىز قازاقستان حالقىنىڭ زور قولداۋىنا يە بولعان كوپ قىرلى ءارى جەمىستى مەملەكەتتىك ساياساتىڭىزدىڭ بەرىك نەگىزى ەكەنى ءسوزسىز»، - دەلىنگەن قىرعىز باسشىسىنىڭ قۇتتىقتاۋىندا.
قىرعىز پرەزيدەنتى ەكى ەلدىڭ تەڭ قۇقىلىق جانە ءوزارا ءتيىمدى سەرىكتەستىك قاعيداتىنا نەگىزدەلگەن ەكى ەلدىڭ دوستىعى، تاتۋ كورشىلىگى مەن ستراتەگيالىق سەرىكتەستىگى بۇدان كەيىن دە باۋىرلاس ەكى ەلدىڭ كەلەشەگى ءۇشىن بەرىك بولا تۇسەتىنىنە سەنىم ءبىلدىردى. المازبەك اتامبايەۆ نۇرسۇلتان نازاربايەۆقا مىقتى دەنساۋلىق، مەملەكەتتىك ساياساتتا تابىستارعا جەتۋدى جانە قازاقستان حالقىنا بەيبىتشىلىك پەن وركەندەۋ تىلەدى.
