استانا كۇنى كەڭ كولەمدە اتاپ وتىلۋدە
وسى ايتۋلى داتادا اۋەلەگەن اۋەندەر، كۇمبىرلەگەن كۇيلەر، شاتتىقتان بال- بۇل جانعان جۇزدەر، سابيلەردىڭ قۋانىشقا تولى ءتاتتى كۇلكىسى، ساحنادا مىڭ بۇرالىپ بي بيلەگەن قىزداردىڭ ونەرى، پالۋانداردىڭ سايىستارى، ۇلتتىق ويىندار، اقىنداردىڭ شابىتتى جىرلارى ەلوردامىزدىڭ كەلبەتىن ودان سايىن اجارلاندىرا ءتۇستى.
ورتالىق الاڭداعى مەرەكەلىك شارانى تاماشالاۋعا كەلۋشىلەردىڭ دە قاراسى كوپ. اعىمداعى جىلى 6,7,8 جانە 9 - شىلدەنى قوسا ەسەپتەگەندە قازاقستاندىقتار ەلوردا كۇنىندە 4 كۇن قاتارىنان دەمالادى. وسى ءتورت كۇن بويى ەل اۋماعىندا مەرەكەلىك شارالار وتپەك. استانا كۇنىنە بايلانىستى ەلورداداعى شارالارعا توقتالساق، ولار ادەتتەگىدەي سان ءتۇرلى فەستيۆالدەرمەن، ونەر جانە ءان كەشتەرىمەن ورنەكتەلدى. ءبىر اپتادان بەرى شاھاردا ەلوردا تۇرعىندارى مەن قوناقتارى ءۇشىن مادەني- بۇقارالىق شارالار كوپتەپ ۇيىمداستىرىلۋدا.
بۇگىن تاڭەرتەننەن «بايتەرەك» مونۋمەنتى الاڭىندا وتاندىق جانە شەتەلدىك ونەر جۇلدىزدارىنىڭ قاتىسۋىمەن ۇلكەن كونسەرت ءوتىپ جاتىر. قالاداعى ءىرى نىسانداردىڭ ءبىرى «حان شاتىر» الاڭىنداعى اۋقىمدى مەرەكەلىك باعدارلاما بويىنشا ەلوردا تۇرعىندارى مەن قوناقتارى ءۇشىن مادەني- بۇقارالىق شارالار كوپتەپ ۇيىمداستىرىلادى. 8 - شىلدە كۇنى بۇل ورتالىقتا قازاقستاننىڭ ەسترادا جۇلدىزدارىمەن مەرەكەلىك كونسەرتى، ال 9 - شىلدەدە استانا قالاسى ۇلتتىق وركەستىرىنىڭ كونسەرتى وتەدى. بۇدان بولەك، بۇگىن «كەرۋەن» و س و ماڭىنداعى الاڭدا كەشكە دەيىن «قالا كۇنىنە» ارنالعان كونسەرت بولادى. ال ەرتەڭ «Keruen City» و س و- دا بۇكىل الەمدىك شوكولاد كۇنىنە وراي شەبەرلىك ساباقتار، ويىن- ساۋىق باعدارلاماسى جوسپارلانعان. 8 - شىلدەدە سۋرەت سالۋ بويىنشا شەبەرلىك ساباقتارى وتپەك.
ەلوردا كۇنىن مەرەكەلەۋ اياسىنداعى ءىرى شارالاردىڭ ءبىرى اشىق اسپان استىندا وتەتىن روك- كونسەرت بولماق. كونسەرت 6 - شىلدەدە قالالىق الاڭدا وتەدى، باستالۋى - ساعات 20:00. استانا تۇرعىندارى مەن قوناقتارى ورتاعاسىلارداعى كوشپەلىلەر مادەنيەتىن تاماشالاۋ مۇمكىندىگىنە يە بولادى، وسى ورايدا بۇل تاماشا كورىنىستى «حان شاتىر» ساۋدا- ويىن- ساۋىق ورتالىعىنىڭ جانىندا «كوشپەلىلەر قالاسى» تاريحي- ەتنوگرافيالىق، مادەني- ويىن- ساۋىق كەشەنىنەن تاماشالاۋعا بولادى.
سونىمەن قاتار 15:00-دە «جاستار» سارايىنىڭ جازعى الاڭىندا كاراوكەدەن استانا اكىمىنىڭ كۋبوگىنا «ءبارى دە ءان ايتادى» اشىق چەمپيوناتى وتەدى. توپ جارعان ءانشى اكىمنىڭ كۋبوگىن يەلەنىپ، اقشالاي سىيلىققا يە بولماق. سونىمەن قاتار بۇگىن الەمدىك تۋرنە اياسىندا ۇزدىك مانەرلەپ سىرعاناۋشىلار ەۆگەنيي پليۋشەنكو، يرينا سلۋتسكايا، نيكيتا ميحايلوۆ، اناستاسيا مارتيۋشيەۆا، نودار مايسۋرادزە، بەلگىلى كانادالىق مانەرلەپ سىرعاناۋشى ەمانۋەل سانديۋ مەن باسقالارى مۇز ايدىنىندا عاجايىپ «شەلكۋنچيك» شوۋ ەرتەگىسىن كوپشىلىك نازارىنا ۇسىنادى. قويىلىم كۇن سايىن شىلدەنىڭ 6-سى مەن 15- ءسى ارالىعىندا ساعات 19.00-دە «بارىس ارەنا» ستاديونىندا وتەدى.
«سەرپەر» حالىق اسپاپتارى وركەسترلەرىنىڭ فەستيۆالى اياسىندا 6- شىلدەدە قالا اكىمدىگىنىڭ ساحنا تورىندە قازاقستان مەن رەسەيدىڭ 6 وركەسترىنىڭ 200 مۋزىكانتى «سەرپەر»، «سارى ارقا» سىندى ۇزدىك كۇيلەردى ورىندايتىن بولادى. كونسەرتتى كورەرمەندەر ساعات 13:00 - 15:00 ارالىعىندا تاماشالاي الادى.
اۆتور: رۋسلان عابباسوۆ
