پرەزيدەنتتىڭ استاناداعى العاشقى كابينەتى قانداي بولعان - فوتو

 ءدال وسى جەردە مەملەكەتتىك ماڭىزى بار شەشىمدەر قابىلداندى. جانە مۇندا پرەزيدەنتتىڭ بۇرىنعى كابينەتى قاز- قالپىندا ساقتالعان. استانا كۇنى قارساڭىندا قازاقپارات ءتىلشىسى ەل ءۇشىن، جەر ءۇشىن، قازاق ءۇشىن ماڭىزى زور وسى ءبىر مۇراجايدى تاعى ءبىر مارتە ارالاپ شىقتى. ەكسكۋرسيالىق قىزمەتتىڭ جەتەكشىسى اسەل شوتكينانىڭ كومەگىمەن ءبىز 20 جىلعا كەيىن شەگىنىپ، سول كەزدەگى اتموسفەرانى سەزىنىپ قايتتىق.

پرەزيدەنت وتىرعان بۇرىنعى كابينەتتىڭ قابىلداۋ بولىمىندە حاتشىنىڭ تەلەفوندارى ءالى تۇر. «وسى تەلەفوندار ارقىلى حاتشى حابارلاسقان ادامداردى پرەزيدەنتكە قوسىپ وتىرعان. سول سەبەپتى وعان بىرنەشە شەت ءتىلىن ءبىلۋ مىندەتى قويىلدى»، - دەيدى اسەل شوتكينا.

بۇگىندە قابىلداۋ بولىمىندە پرەزيدەنتتىڭ ءومىربايانىنا ارنالعان فوتوسۋرەتتەر ءىلىنىپ تۇر. الايدا كابينەتتىڭ ءوزى ەش وزگەرىسسىز قالدى. اتموسفەراسى دا سول قالپى سياقتى. بۇل جەردە ەلباسى 1997-2004 -جىلدارى ەڭبەك ەتتى، سان الۋان جينالىستار مەن شاعىن قۇرامداعى كەزدەسۋلەردى وتكىزدى. ۇستەلدىڭ ۇستىندە جاتقان قۇجاتتار مەن بلوكنوتتار دا سول كەزدەن قالعان تاريحي جادىگەرلەر. ءتىپتى، قالامساپتار دا جاتىر. مەملەكەت باسشىسى ونىمەن كەزىندە جارلىقتار، قاۋلىلار مەن تاعايىنداۋلارعا قول قويعان. 

«بىرنەشە تەلەفوننىڭ اراسىندا ۇلكەن ءبىر اپپاراتتى بايقاۋعا بولادى. ونىڭ باستىرماسى كوپ. اربىرەۋىندە لاۋازىمدى تۇلعانىڭ اتى جازىلعان. ءدال وسى اپپارات ارقىلى پرەزيدەنت سول ادامدارمەن بايلانىسىپ وتىردى. ولاردىڭ ىشىندە مينيسترلەر كابينەتى مەن پرەزيدەنت اكىمشىلىگىنىڭ وكىلدەرى بار»، - دەپ اتاپ كورسەتتى شوتكينا.

كابينەتتىڭ ساۋلەتىندە قازاقتىڭ ۇلتتىق ناقىشتارى ايقىن بايقالادى. ماسەلەن، توبەدە ويۋ- ورنەكتەر بار. ال جيھازدىڭ ءبارى ارنايى تاپسىرىسپەن جاسالعان. پرەزيدەنتتىڭ بۇرىنعى كابينەتىندە تاجىكستان دەلەگاتسياسى الىپ كەلگەن ۆازا دا تۇر. بۇل جەردە قازاقستاننىڭ قازبا بايلىقتارىنا ارنالعان ەلەكتروندى كارتا مەن اقكيىز ءىلىنىپ تۇر. 2015 -جىلعى ۇلىقتاۋ ءراسىمى كەزىندە نۇرسۇلتان نازاربايەۆ ءدال وسى اقكيىزدىڭ ۇستىنە تۇرىپ، ەل الدىندا انت بەرگەن.

كابينەتتەن كەيىنگى زال «الاۋ وشاق زالى»، ءيا بولماسا «كامين زالى» دەپ اتالادى. ول جەردە ۇزاق ءارى اۋىر كەلىسسوزدەردەن كەيىن ەركىن اڭگىمەلەر ايتىلدى. زالدىڭ ساۋلەتى دە كلاسسيكالىق ستيلدە جاسالدى. ونى جاساقتاۋ بارىسىندا اعاشتىڭ ءتۇر- ءتۇرى، ءمارمار مەن گرانيت تاستارى قولدانىلدى.

پرەزيدەنتتىڭ بۇرىنعى رەزيدەنسياسىندا «قىسقى باق» تا ساقتالدى. الايدا ول شاعىن ءارى جانعا جايلى كابينەت ۇلگىسىندە بولعان. «ءبىز ونى «رەلاكس زوناسى» دەپ اتايمىز. بۇل جەردە شاعىن قۇرامداعى كەلىسسوزدەر جۇرگىزىلدى. پرەزيدەنتتىڭ قازىرگى رەزيدەنتسياسى - اقوردادا قىسقى ب ا ق بۇدان الدەقايدا ۇلكەن. ال پانورامالىق تەرەزەلەر ارقىلى ەسىلدىڭ وڭ جاعالاۋى دا، سول جاعالاۋى دا انىق كورىنەدى»، - دەيدى شوتكينا.

 «رەلاكس» زونادان بولەك بەيرەسمي كەزدەسۋلەرگە ارنالعان زال دا بار. ول جەردە مەملەكەت باسشىلارى جەكە- دارا وتىرىپ، شاحمات ويناعان. ءپىل سۇيەگىنەن جاسالعان شاحمات ءالى كۇنگە دەيىن سول زالدا تۇر. بۇل - رەسەي دەلەگاتسياسىنىڭ سىيى.

پرەزيدەنتتىڭ بۇرىنعى دومبىراسى دا وسىندا. ءدال وسى كابينەتتە نۇرسۇلتان نازاربايەۆ «ءۇشقوڭىر» ءانىن جازعان.

بۇرىنعى رەزيدەنسيادا ءماجىلىس زالى دا بار. وندا مەملەكەت باسشىسى سان الۋان جينالىستار مەن كەڭەستەر وتكىزدى.

التىن زالعا بارار جولدا ەلوردانى اقمولاعا كوشىرۋ تاريحىمەن جان- جاقتى تانىسۋعا بولادى. «التىن زال» دەپ اتاۋدىڭ وزىندىك سەبەبى دە جوق ەمەس. ونىڭ ءتۇسى التىن سياقتى ساپ- سارى. سول سەبەپتى جوعارى دەڭگەيدەگى كەزدەسۋلەرگە ارنالعان بولاتىن. بۇدان بولەك، مەملەكەتتىك رامىزدەردى اقمولاعا الىپ كەلگەن كەزدەگى فوتوسۋرەتتەر دە بار. ال «كۇمىس زالدا» رەسمي شارالار ۇيىمداستىرىلدى. قۇجاتتارعا قول قويىلدى، مەملەكەتتىك ناگرادالار تاپسىرىلدى.

ايتا كەتكەن ءجون، بۇرىنعى رەزيدەنسيادا پرەزيدەنتتىڭ شاعىن كابينەتى دە بولعان. وندا دا جۇمىس ۇستەلى، تەلەفوندار مەن كىتاپتارعا ارنالعان شكاف بار. ءدال سول كابينەتتە مەملەكەت باسشىسى سەلەكتورلىق كەڭەستەردى وتكىزدى. 2004 -جىلدان بەرگى تەلەۆيزور دا تۇر. نۇرسۇلتان نازاربايەۆ ول ارقىلى ەل جاڭالىقتارىن كورىپ وتىرعان.

ال سوڭعى زالدا پرەزيدەنت جانىنداعى قاۋىپسىزدىك كەڭەسىنىڭ وتىرىستارى وتكەن. قازىر ونى «قارۋ- جاراق زالى» دەپ اتايدى. سەبەبى ول جەرگە نۇرسۇلتان نازاربايەۆتىڭ قارۋ- جاراق كوللەكسياسى تولىعىمەن قويىلعان.

اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى