بايان ماقسات قىزى ءوز كىتابىنىڭ ساتىلىمىنان تۇسكەن قاراجاتقا جاڭا جوبا اشپاق
بۇگىن الماتىدا «بايان. ءوزىم جايلى عانا ەمەس» كىتابىنىڭ تانىستىرىلىمى وتەدى. جاقىندا عانا پروديۋسەر ءبىر جىل بويى سۇحبات بەرمەيتىنىن حابارلاعان ەدى. سوندىقتان، جاڭا كىتاپتىڭ جارىق كورۋىنە ارنالعان باسپا ءسوز ءماسليحاتىندا جۋرناليستەر وزدەرىن قىزىقتىرىپ جۇرگەن بارلىق ساۋالدى بايان ماقسات قىزى ۇزاق «دەمالىسقا» كەتپەي تۇرعاندا قويىپ الدى.
«مەن جەكە سۇراقتارعا جاۋاپ بەرمەيمىن. ءوز كىتابىمدا مۇمكىندىگىنشە ءبارىن اشىق ايتتىم. كەز كەلگەن ادەكۆاتتى ادام كىتابىمدى وقىعان سوڭ، ماعان سۇراق قويمايتىن بولادى. شىنىمدى ايتسام، باياعىدا زەينەتكە شىققاندا عانا كىتاپ جازامىن دەپ ويلاۋشى ەدىم. قارتايىپ، قولىم بوساعاندا، ەستەلىكتەر جازامىن دەپ ويلاعانمىن. ءبىراق، مەنىڭ ءومىرىمنىڭ استان- كەستەڭى شىقتى... سول سەبەپتى، كىتاپ تا ەرتەرەك جارىق كوردى. مەنىڭ ومىرىمدە اۋىر كەزەڭ بولدى»، - دەپ اقتارىلدى بايان.
جەكە كىتابىنان بولەك، بايان ماقسات قىزى ءوزىنىڭ جاڭا جوباسى - ايەلدەردىڭ قۇقىعىن قورعاۋ قوعامى جايىندا ايتتى. كىتاپتىڭ ساتىلىمىنان تۇسكەن تابىستىڭ باسىم بولىگى اتالعان جوبانىڭ اشىلۋىنا جۇمسالادى.
«ءبارى ساتىلىمنىڭ قالاي جۇرەتىنىنە بايلانىستى. ايەلدەردىڭ قۇقىعىن قورعاۋ ۇيىمىن اشۋ ءۇشىن ساتىلىمنان كوبىرەك اقشا تۇسكەنىن قالايمىن. وندا تۇرمىستاعى زورلىق- زومبىلىق قانا ەمەس، بالالاردى قورعاۋ ماسەلەسىنە دە نازار اۋدارىلادى. ەگەر انا باقىتسىز بولسا، بالا دا باقىتسىز. ەگەر ورتالىق بيىل اشىلسا، «دەمالىسىمدى» ۇزۋگە تۋرا كەلەدى. نەمەسە تەك قانا رەسمي مالىمدەمەلەر عانا جاسايمىن»، - دەپ تولىقتىردى بايان.
تانىمال پروديۋسەر جەكە ومىرىنە قاتىستى سۇراقتاردان باسىن الىپ قاشقانىمەن، وتباسى تۋرالى سۇراققا جاۋاپ بەرۋگە تۋرا كەلدى.
«مەنىڭ ەكى قىزىم ەرەسەك ادامدار. كىتاپ جازعاندا ولاردان نە جازىپ، نە جازباۋ كەرەكتىگى تۋرالى رۇقسات سۇراعان جوقپىن. ءبىراق، بەلگىلى ءبىر قاعيدالاردى ۇستانعانىم راس. كىشى قىزىم كىتاپتى وقىپ، قاتتى جىلاعانىن ايتتى. ال ۇلكەنىممەن بۇل تۋرالى سويلەسىپ ۇلگەرمەدىم، ءبىراق ول ءوزىنىڭ رەتسەنزياسىن دايىنداپ قويدى. ونىڭ كىتاپ تۋرالى پىكىرىن بۇگىن بىلەمىز»، - دەدى پروديۋسەر.
ەسكە سالا كەتسەك، وتكەن جىلدىڭ ماۋسىم ايىندا بايان ماقسات قىزىن بۇرىنعى كۇيەۋى سوققىعا جىققان بولاتىن. دەنساۋلىعى قالپىنا كەلگەن سوڭ، بايان تۇرمىسقا ەكىنشى رەت شىققالى جاتقانىن جاريالادى.
اۆتور: ايجان سەرىكجان قىزى
