استانادا اسىقتىڭ مەرگەندەرى انىقتالدى

 2017 -جىلدىڭ 2-4 شىلدە كۇندەرى استانا قالاسىنىڭ «سارىارقا» ۆەلوترەگىندە اسىق اتۋدان «التىن ساقا» حالىقارالىق تۋرنيرى وتكىزىلدى. جىل سايىن ءداستۇرلى ءوتىپ كەلە جاتقان جارىسقا قىرعىزستان، موڭعوليا جانە قىتاي سپورتشىلارى كەلدى. سونىمەن قاتار الماتى، استانا قالالارى مەن اقمولا، قوستاناي، قاراعاندى، ش ق و، وقو جانە جامبىل وبلىستارىنىڭ قۇراما كوماندالارى قاتىستى. جارىستىڭ اشىلۋ سالتاناتىندا قىرعىزستان رەسپۋبليكاسىنىڭ «ايكۋر» فەدەراتسياسىنىڭ ۆيتسە- پرەزيدەنتى قوجەكەيەۆ ەسكەندىر ءسوز الىپ، اسىق ويىنىنىڭ تاريبەلىك مانىنە توقتالدى.

 «ءبىز قازاق- قىرعىز ەجەلدەن اعايىن حالىقپىز. اسىق ادامدى ەپتىلىككە، مەرگەندىككە، دالدىككە ۇيرەتەدى. ءبىز ۇلتتىق ويىندارىمىزدى كەيىنگى ۇرپاق اراسىندا ۇنەمى دارىپتەۋىمىز كەرەك» ، - دەدى ول.

 تۋرنيردە ەرلەر اراسىندا 13 كوماندا، قىزدار اراسىندا 8 كوماندا باق سىناستى. ءۇش كۇنگە سوزىلعان باسەكەدە ەرلەر اراسىندا «قازاقستان» كومانداسى ءبىرىنشى، قىرعىزستان ەكىنشى ورىندى جەڭىپ الدى. ال ءۇشىنشى ورىندى جامبىل وبلىسى الدى. قىزدار اراسىندا وتكەن «بەس تاس» سايىسىندا جۇلدەلى ورىنداردى قوستاناي، استانا جانە استانالىق «جىگەر» قۇراما كوماندارى ءوزارا ءبولىستى.

«اسىق اتۋ» كوشپەندى حالىقتاردىڭ ەجەلگى عاسىرلاردان كەلە جاتقان ويىنى. ويىن ەرەجەسى بويىنشا، قوي نەمەسە ەشكىنىڭ اسىقتارى پايدالانىلادى. ايتا كەتەيىك، «التىن ساقا» حالىقارالىق ءتۋرنيرى جىل سايىن ءداستۇرلى تۇردە استانا كۇنى قارساڭىندا وتكىزىلىپ كەلە جاتىر.

اۆتور: گۇلسايا جاقان

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى