ەلباسىنىڭ قۇرمەتىنە ات بەرىلگەن نۇرابىناز نازاربايەۆ ۋنيۆەرسيتەتىنە ءتۇسۋدى ارماندايدى
اناسى مۋنيرانىڭ ايتۋىنشا، نۇرابىنازدىڭ اكەسى اسىلبەك پرەزيدەنتتى تۇلعا رەتىندە ەرەكشە قۇرمەت تۇتادى جانە 2003 -جىلى ەكىنشى ءسابيى دۇنيەگە كەلگەندە، نۇرسۇلتان ءابىش ۇلى نازاربايەۆ ەسىمىنىڭ العاشقى بۋىندارىنان ءنۇرابىناز ەسىمىن قۇراستىرعان.
ەڭ باستىسى، ەلدە جوق بۇل ەسىم نۇرابىنازدىڭ وزىنە ۇنايدى. «قىزىمىزعا ءوز ەسىمى قاتتى ۇنايدى، ءنۇرابىناز اتىن ەستىگەندە ەلەڭ ەتپەيتىن ادام جوق دەيدى. اسىرەسە، جىل سايىن 6 شىلدە قارساڭىندا جەرگىلىكتى جۋرناليستەر سۇحباتقا، ءتۇرلى كەزدەسۋلەرگە شاقىرادى. سودان بولار، كوشەدەگى كەزدەيسوق ادامدار ءنۇرابىنازدى تانىپ، امانداسىپ جاتادى. ارينە، قىزىم بۇل ەسىمنىڭ ۇلكەن جاۋاپكەرشىلىك ارتىپ وتىرعانىن تۇسىنەدى، جامان بولۋعا ەش حاقىم جوق دەپ، ۇنەمى قاتارىنىڭ الدى بولۋعا تىرىسادى»، - دەيدى اناسى مۋنيرا.
وتباسىندا نۇرابىنازدىڭ ءبىر اپكەسى مەن ءبىر ءىنىسى بار جانە ولاردىڭ دا اتتارى سيرەك كەزدەسەتىن ەسىمدەر قاتارىندا. «العاشقى قىزىمىز دۇنيەگە كەلەردە اكەسىنە ەرەكشە ايان بەرىلدى. سوعان بايلانىستى تۇڭعىشىمىزعا نۇرشاپاعات دەپ ات قويدىق. ەكىنشى قىزىمىز ءنۇرابىناز، ودان كەيىنگى ۇلىمىزعا يمانعالي تاسماعامبەتوۆتىڭ قۇرمەتىنە نۇريمان ەسىمىن بەردىك»، - دەيدى نۇرابىنازدىڭ اناسى.
نۇرابىنازدىڭ ەسىمىن جاعىمپازدىق دەپ سىناعاندار دا از بولماپتى. مۋنيرا حانىم ولارمەن ەش كەلىسپەيتىنىن ايتتى. «ءبىزدى وڭاي جولمەن پاتەر العىلارىڭ كەلدى مە جازعىرعاندار بولدى. پاتەر دە، سىي- سىياپات تا العان جوقپىز، وعان مۇقتاج دا ەمەسپىز. ىرىمشىل حالىقپىز عوي، كەز كەلگەن اتا-انا بالاسىن ەل جاقسىلارىنا ۇقساسا دەپ تىلەيدى. وتكەن عاسىردا دا مىڭداعان باۋىرجان مەن ديماشتار دۇنيەگە كەلدى. تاۋەلسىز ەلدە ءومىر ءسۇرىپ جاتىرمىز، جاقسىمىزدى ۇلىقتاپ، قىزىمىزعا ەرەكشە ەسىم بەردىك. بۇل ناعىز ەلدىكتىڭ، پاتريوتتىقتىڭ بەلگىسى»، - دەيدى نۇرابىنازدىڭ اناسى مۋنيرا.
نۇرابىناز بالا كەزىندە كوپ اۋىرعان كورىنەدى جانە اتا-اناسى مۇنىڭ سەبەبىن ءۇش ادامنىڭ ەسىمى قاتار قويعاننان دەپ ەسەپتەيدى. «نۇرابىناز بالا كەزىندە كوپ اۋىردى، 12 جاسىندا جۇرە الماي قالدى. مولدالار ورىمدەي قىزعا ءۇش ادامنىڭ ەسىمىن الىپ ءجۇرۋ قيىنعا سوعادى، اتىن وزگەرتىڭدەر دەپ كەڭەس بەردى. سودان بەرى ءۇي ىشىندە ءوزىمىز ءابىش دەپ اتاپ ءجۇرمىز، ال قۇجاتتاعى ەسىمى ءنۇرابىناز بولىپ قالا بەرەدى. قازىر جاعدايى جاقسى».
ەرەكشە ەسىم يەسى نۇرابىناز ءوز ارمان- ماقساتتارىمەن ءبولىستى جانە جامبىل وڭىرىندە ءوز اتتاستارىنىڭ بولۋى مۇمكىن ەكەنىن جەتكىزدى. «قازىر جامبىلدىڭ تۇكپىر- تۇكپىرىندە كىشكەنتاي نۇرابىنازدار ءوسىپ كەلە جاتقان شىعار. اۋرۋحانادا جاتقاندا، وبلىستىق كەزدەسۋلەرگە بارعاندا، « قىزىم بولسا، سەنىڭ ەسىمىڭدى قويامىن» دەپ ۋادە بەرگەندەر كوپ. بيىل 8 -سىنىپتى اياقتادىم. بوس ۋاقىتىمدا ءبي بيلەۋمەن، مانەرلەپ وقۋمەن جانە قولونەرمەن اينالىسامىن. مەكتەپتە حيميا ءپانىن ءسۇيىپ وقيمىن. وسكەندە فارماتسيەۆت بولعىم كەلەدى جانە استاناعا، نازاربايەۆ ۋنيۆەرسيتەتىنە ءتۇسۋدى ارماندايمىن»، - دەيدى نۇرابىناز.
اۆتور: ايجان سەرىكجان قىزى
