قازاق وپەراسىنىڭ ۇلى تۇلعاسى بيبىگۇل تولەگەنوۆا استانادا ءان شىرقايدى
ونەردى باعالايتىن ورەسى بيىك تىڭدارمان وپەرا سالاسىنىڭ جۇلدىزدارىمەن كەزدەسەدى.
ەڭ باستىسى، ولار اسەم ءان تىڭداپ قانا قويماي، وپەرا انشىلەرىنىڭ قۇندى مۇراسى جيناقتالعان انتولوگيامەن تانىسادى.
«استانا ەكسپو - 2017» كورمەسى اياسىندا «قازاق وپەراسىنىڭ جۇلدىزدارى» اتتى كوممەرتسيالىق ەمەس كونسەرت- جوبا وتەدى، دەپ حابارلايدى قازاقپارات. بۇل جوبانىڭ باستى ەرەكشەلىگى - وپەرا تاريحىندا ويىپ تۇرىپ ورىن الاتىن تۇلعالار تۋرالى ارحيۆتەردەن الىنعان قۇندى دەرەكتەر، فوتوسۋرەتتەر مەن ولاردىڭ داۋىسى جازىلعان ۆيدەوماتەريالدار ساندىق تەحنولوگياعا كوشىرىلىپ، CD، DVD ديسكتەرگە جيناقتالدى.
اتاپ ايتقاندا، كۇلاش بايسەيىتوۆا، روزا باعلانوۆا، ريشات ابدۋللين، بيبىگۇل تولەگەنوۆا، ەرمەك سەركەبايەۆ، روزا جامانوۆا، الىبەك دىنىشوۆتەردىڭ شىعارماشىلىق مۇرالارىنا ارنالىپ جەكە-جەكە بۋكلەتتەر دايىندالدى.
ياعني، ءبىر عانا انتولوگيالىق جيناقتا جەتى بىردەي قازاقستاندىق وپەرا ونەرىنىڭ شەبەرلەرى، ك س ر و حالىق ارتيستەرىنىڭ ءومىر-دەرەگى، شىعارماشىلىعى قامتىلدى. قۇندى دۇنيەلەر جيناقتالدى. انتولوگيا وپەرا انشىلەرىنىڭ اندەرى جازىلعان 7 اۋديوديسكتەن (ءار ورىنداۋشىعا ءبىر ديسكتەن) جانە ولاردىڭ كونسەرتتىك، وزگە دە ۆيدەولارى بار 7 DVD- ديسك پەن بۋكلەتتەن تۇرادى. جوبانى ۇيىمداستىرۋشى ق ر مادەنيەت جانە سپورت مينيسترلىگى مەن «ميراس» قوعامدىق ۇلتتىق مادەني قورى» قوعامدىق قورى.
اقپاراتتىق دەمەۋشى - KAZAKH TV جانە س ت ۆ تەلەارنالارى. جوبا اۆتورى - ك س ر و حالىق ءارتيسى، سوتسياليستىك ەڭبەك ەرى بيبىگۇل تولەگەنوۆا. ارينە، جوبانىڭ نەگىزگى ماقساتى وپەرا انشىلەرىنىڭ شىعارماشىلىعىن تۇگەندەپ، جاس ۇرپاققا كلاسسيكالىق مۋزىكانى ناسيحاتتاۋ. تاريحي ميسسياسى دا ءبىر بولەك.
«مۇنداي جوبا ەلىمىزدە ءبىرىنشى رەت جاسالىپ وتىر. بۇعان دەيىن وپەرا انشىلەرىنىڭ بارلىعىنىڭ بىردەي شىعارماشىلىعى مەن سۋرەتتەرى، اندەرى ءبىر انتولوگياعا جيناقتالعان ەمەس. ء«ولى رازى بولماي - ءتىرى بايىمايدى» دەگەن بار.
سول سەبەپتى، وسى كەم- كەتىكتىڭ ورنىن تولتىرعىمىز كەلدى»، - دەيدى ك س ر و حالىق ءارتيسى، سوتسياليستىك ەڭبەك ەرى بيبىگۇل تولەگەنوۆا.
انتولوگيا تۇساۋكەسەرىمەن بىرگە كورنەكتى انشىلەردىڭ قاتىسۋىمەن كونسەرت وتەدى. كونسەرتكە قاتىسۋشىلار: كەڭەس وداعىنىڭ حالىق ءارتىسى، سوتسياليستىك ەڭبەك ەرى بيبىگۇل تولەگەنوۆا، قازاقستاننىڭ ەڭبەك سىڭىرگەن قايراتكەرلەرى: ءالفيا كاريموۆا، تالعات مۇسابايەۆ، تامارا اسار، اندرەي ترەگۋبەنكو، جۇپار عابدۋللينا، حالىقارالىق كونكۋرستاردىڭ لاۋرەاتى - رۋستام سۇلەيمانوۆ، استانا قالاسى اكىمدىگىنىڭ مەملەكەتتىك اكادەميالىق فيلارمونياسىنىڭ سيمفونيالىق وركەسترى (كوركەمدىك جەتەكشىسى - بەرىك باتىرحان ۇلى، ديريجەرى ەربولات احمەدياروۆ). شارا «قازاقستان» ورتالىق كونسەرت زالىندا 9 -شىلدە كۇنى ساعات 18.30-دا باستالادى.
