ت. سۇلەيمەنوۆ مەملەكەتتىك مەنشىك نىساندارىن جەكەشەلەندىرۋدەن تۇسەتىن تابىس كولەمىن اتادى
بۇل تۋرالى بۇگىن ۇكىمەت وتىرىسىندا مەملەكەتتىك نىسانداردى جەكەشەلەندىرۋ ماسەلەسىنە قاتىستى بايانداما جاساعان ق ر ۇلتتىق ەكونوميكا ءمينيسترى تيمۋر سۇلەيمەنوۆ ءمالىم ەتتى، دەپ حابارلايدى قازاقپارات.
«مەملەكەت باسشىسى قازاقستان رەسپۋبليكاسى ۇكىمەتىنىڭ 2016 -جىلعى 10- اقپاندا وتكەن كەڭەيتىلگەن وتىرىسىندا جەكەشەلەندىرۋدەن تۇسكەن قاراجاتتى ۇلتتىق قورعا جىبەرۋ شارالارىن قابىلداۋدى تاپسىرعان ەدى. اتالعان تاپسىرمانى ورىنداۋ ءۇشىن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەرگىلىكتى ءوزىن- ءوزى باسقارۋدى دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ق ر زاڭ جوباسى اياسىندا بيۋدجەتتىك كودەكسپەن «مەملەكەتتىك مۇلىك تۋرالى» ق ر زاڭىنا سايكەسىنشە تۇزەتۋلەر ەنگىزىلدى. ول ق ر پارلامەنت سەناتى تاراپىنان قولداۋعا يە بولدى. قازىر قۇجات قول قويۋ پروتسەسىندە»، - دەدى مينيستر.
ونىڭ ايتۋىنشا، ۇلتتىق باسقارۋشى حولدينگتەر قۇرامىنا كىرەتىن مەملەكەتتىك مەنشىكتى جەكەشەلەندىرۋ مەن اكتيۆتەردى ساتۋدان تۇسەتىن بولجامدى تابىس 4-7 ميلليارد ا ق ش دوللارىن قۇرايدى. ءتۇسىم مولشەرى ساۋدا ناتيجەسىنە بايلانىستى بولماق.
«ينۆەستورلار نەگىزىنەن «سامرۇق- قازىنا» قورىنىڭ ءىرى 47 اكتيۆىنە قىزىعۋشىلىق تانىتۋدا. ونىڭ 7-ەۋى IPO/SPO ارقىلى ساتىلادى. قوردىڭ ءىرى كومپانيالارىنىڭ IPO ستراتەگياسى بويىنشا قابىلداعان شەشىمىنە سايكەس، IPO- دان تۇسەتىن ءتۇسىم مولشەرىنىڭ بولجامى 3,5 ميلليارد ا ق ش دوللارىنان 5,5 ميلليارد ا ق ش دوللارىنا دەيىن قۇراۋى مۇمكىن»، - دەدى سۇلەيمەنوۆ.
اۆتور: مارلان جيەمباي
