تۇرعىن ءۇي قۇرىلىس جيناق بانكى كليەنتتەرى ءۇشىن بارلىق كوميسسيانى جويدى

بۇل تۋرالى بۇگىن ورتالىق كوممۋنيكاتسيالار قىزمەتىندەگى بريفينگتە اتالعان بانك باسقارماسى ءتوراعاسىنىڭ ورىنباسارى جانار جۇبانيازوۆا ءمالىم ەتتى، دەپ حابارلايدى قازاقپارات. «تۇرعىن ءۇي قۇرىلىس جيناق بانكى» مەن «قازپوشتا» ىنتىماقتاستىق تۋرالى كەلىسىمگە قول قويدى. ەندىگى ۋاقىتتا «تۇرعىن ءۇي قۇرىلىس جيناق بانكى» سالىمشىلارى «قازپوشتانىڭ» كەز كەلگەن بولىمشەسىنەن بانكتىڭ ونىمدەرى بويىنشا كەڭەستەر الىپ، كرەديتتەرىن جاۋىپ، دەپوزيتتەرىن تولىقتىرا الادى. بۇعان دەيىن نەسيەنى جاپقانى نەمەسە دەپوزيتىن تولىقتىرعانى ءۇشىن 1 پروتسەنت مولشەرىندە كوميسسيا بەكىتىلگەن ەدى.

بۇگىنگى كۇنى بۇل شارا «تۇرعىن ءۇي قۇرىلىس جيناق بانكى» سالىمشىلارى ءۇشىن تەگىن»، - دەدى ول. ونىڭ ايتۋىنشا، بانك «قازپوشتانىڭ» تارامدالعان بولىمشەلەرىنىڭ ارقاسىندا قازاقستاننىڭ بارلىق تۇرعىندارىنا ساپالى قىزمەت كورسەتەتىن بولادى. بانك شامامەن 950 مىڭ سالىمشىعا قىزمەت كورسەتەدى. ولاردىڭ دەپوزيت قورجىنى 460 ميلليارد تەڭگەنى قۇرايدى. «تۇرعىن ءۇي قۇرىلىس جيناق بانكىنەن» دەپوزيت اشۋ ءۇشىن سالىمشى ءوز شوتىنا 15 مىڭ تەڭگە سالۋى ءتيىس.

بۇل كوميسسيا ەمەس، اقشا تولىعىمەن سالىمشىنىڭ شوتىنا تۇسەدى. قازىرگى ۋاقىتتا شامامەن 200 مىڭ سالىمشىعا ينتەرنەت- بانكينگ جانە موبيلدى بانكينگ قىزمەتى ارقىلى قىزمەت كورسەتىلۋدە. ونىڭ 47 مىڭى مەملەكەتتىك باعدارلاماعا قاتىسۋ مۇمكىندىگىن الدى. «تۇرعىن ءۇي قۇرىلىس جيناق بانكىنىڭ» باسقا دا سەرىكتەستەرىمەن ۋاعدالاستىعى بار. بانك كليەنتتەرى «حالىق بانكى»، «كاسپيي بانكى»، «ەۋرازيالىق بانك»، «قازكوممەرسبانك» فيليالدارىندا دەپوزيتتەرىن تولىقتىرىپ، نەسيەلەرىن جابا الادى.

بۇل رەتتە «تۇرعىن ءۇي قۇرىلىس جيناق بانكى» كلينەتتەرى ءۇشىن بارلىق كوميسسيالىق الىمدار جويىلعان. ويتكەنى بارلىق شىعىستى بانك ءوز موينىنا الادى»، - دەدى جۇبانيازوۆا.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى