ۇلتتىق بانك التىن قۇيمالاردىڭ ساۋداسى قالاي ءجۇرىپ جاتقاندىعىن ايتتى

 «اكسيا باستالعالى بەرى كوپ ۋاقىت وتپەدى. سوندىقتان ديناميكا تۋرالى ايتۋ ازىرگە ەرتە. ءبىراق حالىق تاراپىنان قىزىعۋشىلىق كوپ. موبيلدى قوسىمشا، تەلەفون ارقىلى حابارلاسىپ سۇراپ جاتىر. قۇيما تۇرىندەگى التىن قارجى جيناقتاۋدىڭ قاراپايىم قۇرالى. ونى جيناۋعا، ءارى كەيىن ەكىنشى دەڭگەيلى بانككە وتكىزۋگە بولادى»، - دەدى ق ر ۇلتتىق بانكىنىڭ قارجىلىق قىزمەت تۇتىنۋشىلارىنىڭ قۇقىعىن قورعاۋ جانە سىرتقى بايلانىستار باسقارماسىنىڭ باسشىسى الەكساندر تەرەنتيەۆ.

 ۇلتتىق بانك ماماندارىنىڭ ايتۋىنشا، حالىق اراسىندا 10 جانە 20 گرامدىق قۇيمالار جاقسى سۇرانىسقا يە بولىپ وتىر. «ۇلتتىق بانك ەكىنشى دەڭگەيلى بانكتەرگە 16500 گرام التىن نەمەسە 682 قۇيما ساتتى. بۇل قۇيمالاردى تۇتىنۋشىلار بانكتەردەن ساتىپ الا الدى. قازىرگى ۋاقىتتا قانشا التىن ساتىلعانىن «حالىق بانكى» ا ق مەن «ەۋرازيا بانكى» ا ق حابارلاسىپ ءبىلۋى كەرەك»، - دەدى ا. تەرەنتيەۆ.

 ونىڭ ايتۋىنشا، باسقا بانكتەر باعدارلاماعا ءالى قاتىسقان جوق. ۇلتتىق بانك بۇل باعىتتا جۇمىس جاساپ جاتىر. ايتا كەتۋ كەرەك، ق ر ۇلتتىق بانكى 31 - مامىردان باستاپ حالىققا ارنالعان تازارتىلعان التىن قۇيمالاردى ساتۋ مەن ساتىپ الۋ باعدارلاماسى ىسكە قوسقان بولاتىن. تۇتىنۋشىلار قازاقستان تەڭگە سارايى دايىنداعان سالماعى 10، 20, 50 جانە 100 گرام بولاتىن التىن قۇيمالاردى ساتىپ الا الادى.

 اۆتور: گۇلميرا عوسمانالي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى