ەندى ءتىسىڭىزدى جۇلدىرمايسىز. قازاقستاندا جاڭا ءدارى شىقتى
بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگتە «ىnnoDent» ج ش س ديرەكتورى باۋىرجان ايتۋوۆ ءمالىم ەتتى دەپ حابارلادى قازاقپارات.
- ءبىزدىڭ جاڭالىق ءتىس جەگىسىنىڭ العاشقى كەزەڭدەرىندە ءتىستى بۇرعىلاماي-اق ەمدەۋگە مۇمكىندىك بەرەدى. تەحنولوگيا ءتىس ەمالىنىڭ تابيعي قايتا قالپىنا كەلۋىن يميتاتسيالايدى. ەگەر كلينيكادا ءسىزدىڭ نەمەسە بالاڭىزدىڭ تىسىنەن جەگىنىڭ العاشقى بەلگىسىن انىقتايتىن بولسا، تىسكە ءبىزدىڭ ءونىمنىڭ ءبىر تامشىسى تىسىڭىزگە تامىزىلادى. ءبىر ايدىڭ ىشىندە ءتىستىڭ سىرتقى قاباتى قالپىنا كەلەدى. ولگەن تىندەر قايتا وسەدى.
جاڭالىعىمىزدىڭ يننوۆاتسيالىق تۇسى - بۇل ءبىر رەتتىك پروسەدۋرا. تىسكە پلومبا سالۋ جانە ءتىستى تەسۋ قاجەتتىلىگى بولمايدى. ول 15 مينۋتقا عانا سوزىلادى»، - دەپ اتاپ ءوتتى اتالمىش ءونىمدى ويلاپ تاپقان باۋىرجان ايتۋوۆ.
ونىڭ ايتۋىنشا، اتالمىش تەحنولوگيا حالىق ءۇشىن وتە قولجەتىمدى جانە قاراپايىم پلومبالاۋ ادىسىنەن قىمبات بولمايدى.
«ءونىمدى ءبىز ءوزىمىزدىڭ فورمۋلامەن شۆەيتساريادا جاسايمىز. ءبىز ونى استانادا تىستاپ، ارى قاراي كلينيكالارعا وتكىزەمىز. تەحنولوگيالىق دامۋ بويىنشا ۇلتتىق اگەنتتىكتەن ءبىز يننوۆاتسيالىق ستارتاپتى قولداۋ گرانتىن ۇتىپ الدىق. ول قاراجات ءبىزدىڭ ءونىمدى قاپتاماعا وراۋ تەحنيكاسىن ساتىپ الۋعا جۇمسالدى. بۇل ءونىم قازىرگى ۋاقىتتا قولجەتىمدى، ياعني سىزدەر كلينيكاعا بارىپ، ءتيىستى ەم- دوم الا الاسىزدار.
الماتىدا - 35، استانادا - 11 كلينيكادا بار. سونىمەن قاتار رەسەيدىڭ - 15، ۋكراينانىڭ 15 كلينيكاسىندا قولدانىلۋدا. وسى ايدا ءبىز شىمكەنتكە، وسكەمەنگە وقىتۋ وتكىزۋ ءۇشىن بارامىز. جىل سوڭىنا دەيىن وسى ەكى قالادا شامامەن 20 كلينيكادا InnoDent تەحنولوگياسىمەن ەمدەۋ پايدا بولادى دەپ بولجاپ وتىرمىز»، - دەيدى ونەرتاپقىش.
ايتا كەتەيىك، رەسپۋبليكانىڭ ەڭ ۇزدىك جوبالارى 25 -قاراشا كۇنى يننوۆاتسيالىق كونگرەسس بارىسىندا ۇسىنىلماق. ال ەڭ ۇزدىكتەرى كەلەر جىلى بولاتىن حالىقارالىق ەكسپو-2017 كورمەسىندە كورسەتىلەتىن بولادى.
ءتىس دارىگەرلەرىنىڭ تابىسى رەكوردتىق دەڭگەيگە جەتتى
2016 -جىلى قازاقستان ستوماتولوگتارى شامامەن 3 ميلليارد تەڭگە تازا تابىس تاپتى. بۇل قازاقستاندا وسى سالانىڭ سوڭعى 5 -جىلداعى رەكوردتىق كورسەتكىشى.
2015 -جىلمەن سالىستىرعاندا ءتىس دارىگەرلەرىنىڭ تازا تابىسى 40,7 پايىزعا ارتتى.
جالپى، دەنساۋلىق ساقتاۋ سالاسىندا وتكەن جىلى 7 ميلليارد تەڭگەنىڭ تابىسى تىركەلدى. ال 2015 -جىلى سالا كەرىسىنشە 2,6 ميلليارد تەڭگە شىعىندالعان ەدى.
ءتىس دارىگەرلەرىنىڭ تابىسىنىڭ ارتۋىن ساراپشىلار حالىقتىڭ تابىسىنىڭ كوبەيۋىمەن تۇسىندىرەدى.
وتكەن جىلى تازا تابىس 40 پايىز شاماسىندا ۇلعايسا، وعان دەين بەس جىل بويى ەڭ قارقىندى ءوسىم 14 پايىزدان كوتەرىلمەگەن ەدى.
ءتىس دارىگەرلەرىنىڭ تابىسىنىڭ ارتۋى وسى سالاداعى قىزمەت قۇنىنىڭ قىمباتتاۋىنا بايلانىستى. ماسەلەن، بىلتىر ءتىس جۇلۋ قىزمەتى 10,5 پايىزعا قىمباتتادى.
بىلتىر، جالپى رەسپۋبليكا بويىنشا الماتى قالاسى مەن اتىراۋ جانە قوستاناي وبلىستارىندا ءتىس دارىگەرلەرى قارقىندى جۇمىس ىستەدى.
