استانا كۇنى مەرەكەسىندە وڭىرلەردە قانداي ءىس- شارالار وتەدى
ورتالىق كوممۋنيكاتسيالار قىزمەتىنىڭ رەسمي وكىلى وكسانا لوسكۋتوۆا الدا كەلە جاتقان مەرەكە قۇرمەتىنە وراي وبلىس- وبلىستاردا وتەتىن ءىس- شارالار لەگىمەن تانىستىردى، دەپ حابارلايدى «قازاقپارات» ح ا ا ءتىلشىسى.
وكسانا لوسكۋتوۆانىڭ ايتۋىنشا، اپتانىڭ ءبىرىنشى كۇنىنەن-اق استانانىڭ جەتىستىكتەرىنە قۇرمەت كورسەتۋ باستالىپ كەتكەن.
اتاپ ايتقاندا، سولتۇستىك قازاقستان وبلىسى ەلوردانىڭ 19 جىلدىعىنا «مەنىڭ ەلىم» پاتريوتتىق اكسياسىن ارناسا، وسكەمەندە بولاشاقتىڭ قالاسى - استانا تۋرالى بەينەفيلمدەر كورسەتۋمەن ۆيرتۋالدى ينتەراكتيۆتى ساياحات ۇيىمداستىرىلعان.
ال 4 -شىلدە كۇنى تاراز قالاسىندا «ءان- جىرىم ساعان، استانا!» فەستيۆالى جانە «استانا - تاۋەلسىزدىك تىرەگى!» اتتى فوتوكورمە اياسىندا ءبي توپتارى اراسىندا كونكۋرس وتسە، پاۆلودار قالاسىندا ينتەللەكتۋالدىق ويىن بولماق. 6 -شىلدە كۇنى استانانىڭ تۋعان كۇنىنىڭ قۇرمەتىنە بارشا قازاقستان بويىنشا سالتاناتتى شارالار بولادى. ولاردىڭ اراسىندا قوستاناي وبلىسىنىڭ اكىمى ارحيمەد مۇحامبەتوۆتىڭ قاتىسۋىمەن كوپپاتەرلى تۇرعىن ءۇي پايدالانۋعا بەرىلەدى. تاراز قالاسىندا «ساعان ارنالادى، استانام!» اتتى ءتۇرلى ەتنوستار وكىلدەرىنىڭ قاتىسۋىمەن جالپى كروسس جانە فەستيۆال وتەدى.
قاراعاندىدا استانا قالاسىنىڭ قالىپتاسۋ كەزەڭدەرىنە ارنالعان ق ر پرەزيدەنتىنىڭ ۇزەڭگىلەستەرىمەن كەزدەسۋ وتكىزىلەدى. 7 -شىلدەدە پاۆلودار وبلىسىندا جاستار اراسىندا گرەك- ريم كۇرەسى بويىنشا وبلىس چەمپيوناتى باستالسا، قوستاناي وبلىسىندا توعىزقۇمالاق بويىنشا رەسپۋبليكالىق تۋرنير ۇيىمداستىرىلادى.
ءدال وسى كۇنى شىعىس قازاقستان وبلىسىندا «التىن تۇرعىسىن» حالىق شىعارماشىلىعىنىڭ حالىقارالىق فەستيۆالىنىڭ اشىلۋى وتكىزىلەدى. سونداي-اق يۋنيورلار مەن جاسوسپىرىمدەر اراسىندا «قازاقستان ءۇمىتى» اتتى رەسپۋبليكالىق كوپ كۇندىك ۆەلوجارىس باستالادى. 8 -شىلدە كۇنى پاۆلودار وبلىسىندا «ەكسپو-2017» حالىقارالىق كورمەسىنە ارنالعان ارداگەرلەر اراسىندا دۋاتلون بويىنشا اشىق چەمپيونات ۇيىمداستىرىلادى. قوستاناي وبلىسىندا «قوستاناي- قازان- سابانتوي-2017» رەسپۋبليكالىق مەرەكەسى وتەدى.
ايان ءورىباي
