ومىرلەرىڭە نەمقۇرايلى قاراماڭدار - مينيستر مۇحامەدي ۇلى

مينيستر مۇنداي پىكىردى الماتىدا وتكەن IV جاستار سپورتتىق ويىندارى كەزىندە كوز جۇمعان دانا احمەتوۆاعا قاتىستى ءبىلدىردى، دەپ حابارلايدى قازاقپارات ءتىلشىسى.

«مەن اكە رەتىندە، مادەنيەت جانە سپورت مينيستر رەتىندە كوپ ويلاندىم جانە جاس سپورتشىلارعا ايتارىم، سەندەر جاسسىڭدار، جالىڭداپ تۇرسىڭدار، الايدا ءوز ومىرلەرىڭە نەمقۇرايلى قاراڭدار دەگىم كەلەدى. ءبىز بارلىعىمىز سەندەردىڭ جەتىستىكتەرىڭە قۋانامىز، الايدا ەشكىم اتا- اناسىنا بالاسىن قايتارىپ بەرە المايدى. وسىنى ەستەرىڭنەن شىعارماڭدار»، - دەدى مينيستر فەيسبۋكتەگى پاراقشاسىندا.

ول مينيستر رەتىندە سپورتتىق جارىستاردا مۇنداي وقيعالاردى بولدىرماس ءۇشىن ۇيىمداستىرۋشىلارعا ءتيىستى تالاپ قويۋعا ۋادە ەتتى.

«جارىس كەزىندە ادامعا تۇسەتىن جۇكتەمە مەن قاۋىپتەردى نازارعا الۋ قاجەت. ءبىز ۇلكەندەر بالالارىمىزدىڭ ومىرىنە نەمقۇرايلى قاراماۋىمىز كەرەك»، - دەدى مينيستر. ونىڭ سوزىنە قاراعاندا، دارىندى جاس سپورتشى دانامەن قوشتاسۋ سولتۇستىك قازاقستان وبلىسىنداعى توقۋشى ەلدىمەكەنىندە وتەدى.

سونداي-اق مينيستر دانانىڭ دارىندى سپورتشى ەكەندىگىن ايتا كەلە، ونىڭ ماۋسىم باستالعالى بەرى جاستار ويىندارىنىڭ شوسسەدەگى سايىسىندا - كۇمىس، ترەكتەگى سايىستا - 2 قولا مەدالىن يەمدەنگەنىن ەسكە الدى.

ەسكە سالا كەتسەك، سولتۇستىك قازاقستان وبلىسىنىڭ 17 جاستاعى ۆەلوسيپەدشىسى دانا احمەتوۆا 29 -ماۋسىم كۇنى الماتى قالاسىنىڭ №7 -اۋرۋحاناسىندا كوز جۇمدى. ول 23 -ماۋسىم كۇنى IV جاستار سپورتتىق ويىندارىندا ەسىنەن تانىپ قۇلاعان. بۇعان دەيىن دانانىڭ ولىمىنە نە سەبەپ بولعانىن جازعان بولاتىنمىز.

اۆتور: گۇلسايا جاقان

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى