قازاقستاندىق ەلشى ەلباسىن كۇتىپ الۋ ءۇشىن يزرايلدىك قوناق ءۇيدى باسقاردى

 ول قوناقۇي اپارتامەنتىن پرەزيدەنت نۇرسۇلتان نازاربايەۆتىڭ يزرايل پرەمەر- ءمينيسترى اريەل شارونمەن كەلىسسوزدەر وتكىزۋىنە دايىنداۋ قاجەت بولعان.

«2000 -جىلدىڭ ءساۋىر ايىندا قازاقستان پرەزيدەنتى نۇرسۇلتان نازاربايەۆ يزرايلگە ەكىنشى رەت رەسمي ساپارمەن كەلدى. مەملەكەت باسشىسىن يەرۋساليم قالاسىندا جاڭادان اشىلعان «حيلتون» قوناقۇيىنە ورنالاستىرۋ تۋرالى شەشىم قابىلداندى. ءبىزدىڭ پرەزيدەنتكە دەيىن مۇندا ا ق ش پرەزيدەنتى بيلل كلينتون مەن ر ف پرەزيدەنتى بوريس ەلتسين عانا قوناقتاعان بولاتىن. سول قوناق ۇيدە يزرايلدىڭ قايتا سايلانعان پرەمەر- مينيسترىمەن ءبىرقاتار ەكىجاقتى كەزدەسۋلەر جوسپارلاندى جانە ەلشىنىڭ كەڭەسشىسى ۇيىمداستىرۋ جۇمىستارىنا جاۋاپتى ادام رەتىندە مەنى تاڭدادى. ادەتتەگىدەي، قوناقۇيگە ەرتە كەلگەن مەن، ءبىرىنشى كەزەكتە عيماراتتىڭ دايىندىعىن تەكسەرۋگە كىرىستىم. سويتسەم، نىسان تۇك تە دايىن ەمەس! كوز الدىمدا تاۋداي ۇيىلگەن ىدىس- اياق (وتكەن شارادان قالعان)، قالعىپ- مۇلگىگەن قىزمەتكەرلەر، قوناقۇي جاڭادان اشىلعاندىقتان قىزمەتكەرلەر كاسىبيلىك تۇرعىدا اقساپ تۇرعان ەدى. يزرايل سىرتقى ىستەر مينيستىرلىگىنىڭ پروتوكولى ءۇنسىز عانا يىعىن كوتەردى»، - دەيدى ەلشى.

 ال شاعىن قۇرامداعى كەلىسسوزدەر جوسپارلانعان ەكىنشى بولمە ءتىپتى بوس بولماي شىقتى. تىعىرىقتان شىعار جالعىز جول - كەلىسسوزدەردى مەملەكەت باسشىسىنىڭ اپارتامەنتىندە وتكىزۋ بولدى. «جاۋاپكەرشىلىكتى ءوز موينىما الىپ، پرەزيدەنتتىڭ كۇزەت قىزمەتىنىڭ وفيتسەرىنەن كەزدەسۋدىڭ حاتتامالىق دايىندىعىن وتكىزۋ ءۇشىن پرەزيدەنتتىك ءنومىردى اشۋدى سۇرادىم. ۋاقىت وتە تىعىز، 30 مينۋت قانا قالدى. ويىمدا ءبىرىنشى ۇشاقپەن قازاقستانعا قايتىپ بارا جاتقانىمدى ەلەستەتىپ ۇلگەردىم. قوناقۇي قىزمەتكەرلەرى جەدەل شەشىم قابىلداي المادى، ولارعا جوعارى باسشىلىقتىڭ كەلىسىمدەرى مەن ءتۇرلى نۇسقاۋلىقتارى قاجەت بولدى. وعان بىزدە ەش ۋاقىت جوق. بار كۇش- جىگەرىمدى جيناپ، قوناق ءۇيدى باسقارۋدى قولعا الدىم. كەڭەستىك كەزەڭدە كومسومول جانە پارتيا جۇمىستارىندا باسشىلىق لاۋازىمدارىن اتقارىپ ءجۇرىپ جيناعان تاجىريبەمە سۇيەنىپ، قوناقۇي قىزمەتكەرلەرىنە قاتاڭ تۇردە بۇيرىق بەرە باستادىم»، - دەدى بولات سارسەنبايەۆ.

 «باقىتىما وراي، پرەزيدەنتتى قوناقۇي الدىندا ودان سۇحبات العىسى كەلگەن جۋرناليستەر بىرنەشە مينۋت ۇستاپ تۇردى. سول ساتتە «مەنىڭ» قىزمەتكەرلەرىم تازالاۋ جۇمىستارىن اياقتاپ، لاس ىدىستاردى شىعارىپ، زالدى كەڭەيتىلگەن قۇرامداعى كەزدەسۋگە ازىرلەدى. پرەزيدەنت كەلىسسوزدەر زالىنا كىرگەن كەزدە، بىرنەشە مينۋت بۇرىن مۇندا نە بولعانىن ەشكىم اڭعارعان دا جوق»، - دەپ تولىقتىردى ول.

 كەڭەيتىلگەن قۇرامداعى كەلىسسوزدەر ءجۇرىپ جاتقاندا، پرەمەر اريەل شارونمەن شاعىن قۇرامداعى كەزدەسۋ ءۇشىن مەملەكەت باسشىسىنىڭ اپارتامەنتىندە قىزۋ دايىندىق ءجۇرىپ جاتتى. «ەكى كەزدەسۋ دە ءساتتى ءوتتى»، - دەيدى ديپلومات.

 «مۇنداي كەلەڭسىزدىكتەر قايتالانباس ءۇشىن، كەيىنگى ەكى كۇن بويى تاڭەرتەڭ قوناقۇي قىزمەتكەرلەرىمەن پرەزيدەنت ساپارى اياسىنداعى ءتۇرلى شارالاردى وتكىزۋگە دايىندىق جونىندە نۇسقامالىق جينالىس وتكىزدىم. ساپار قورىتىندىسى بويىنشا، پرەزيدەنت ەلشىلىكتىڭ جۇمىسىنا جوعارى باعا بەردى، ال قوناق ءۇيدىڭ باس مەنەدجەرى مەنىڭ قوناق ءۇيدى وپ- وڭاي باسقارىپ كەتە الاتىنىمدى ايتتى»، - دەپ ەسكە الدى ب. سارسەنبايەۆ.

 ەلشىنىڭ بۇل وقيعاسى قازاقستان رەسپۋبليكاسى ديپلوماتيالىق قىزمەتىنىڭ 25 جىلدىعىنا ارنالعان «ديپلوماتيالىق ەپيزودتار» جوباسى اياسىندا ق ر سىرتقى ىستەر مينيسترلىگىنىڭ فەيسبۋكتاعى پاراقشاسىندا جاريالاندى. ەسكە سالا كەتسەك، 2 - شىلدە كۇنى قازاقستاندا ديپلوماتيالىق قىزمەت كۇنى اتالىپ وتەدى.

 اۆتور: ايجان سەرىكجان قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى