شىمكەنتتەگى بالاباقشادا ءبۇلدىرشىن ۇيقىدان ويانباي قالدى
مەكتەپكە دەيىنگى مەكەمە قىزمەتكەرلەرىنىڭ سوزىنە قاراعاندا، 2 جاس 8 ايلىق ەر بالا ءتۇستىڭ كەزىندە توسەگىنە جاتىپ ۇيىقتاپ، سودان ويانباعان، دەپ حابارلايدى قازاقپارات ح ا ا ءتىلشىسى.
ءوڭىردىڭ ءبىلىم سالاسى باسشىلىعى بەرگەن مالىمەتكە قاراعاندا، قايعىلى جاعداي ناۋرىز شاعىن اۋدانىنداعى بالاباقشادا بولعان.
مارقۇم بولعان ءبۇلدىرشىن ادەتتەگىدەي باقشاعا كەلىپ، بالالارمەن بىرگە ويناعان. تاماعىن دا ءىشىپ، ءوزىن قالىپتى جاعدايدا ۇستاعان. الايدا تۇسكى تىنىعۋ كەزىندە ول ماڭگىگە ۇيىقتاپ كەتە بارعان.
ونى وياتا الماعان تاربيەشىلەر دەرەۋ جەدەل جاردەم قىزمەتى مەن پوليتسيانى شاقىرتقان.
دارىگەرلەر كەلگەن ۋاقىتتا بالانىڭ جانى شىعىپ كەتكەن ەكەن. قازىر اتالعان وقيعا بويىنشا تەكسەرۋ شارالارى جۇرگىزىلۋدە.
بىرنەشە سوت مەديتسينالىق ساراپتامالار تاعايىندالدى. ونىڭ قورىتىندىسىنا سايكەس، بالانىڭ قايتىس بولۋ سەبەپتەرى انىقتالاتىن بولادى.
اۆتور: اينۇر اقبايەۆا
